Dezgehê dewleta tirke yê fermîyî Dîyanetî bi waştişnameyêkî muracat kerd ke tewrê Dewaya Kobanê bibo.

Wekîlê Partîya Çep a Keske yê Amedî Serhat Erenî Merkezê Pêroyî yê HDPyî de kombîyayîşê çapemenîye de qisey kerd û vera waştişnameyê Dîyanetî nêrazîbîyayîş mojna.

Erenî kombîyayîş de vist vîrî ke îqtîdarê AKP-MHPyî Dewaya Kobanê kerda dewaya qesasî û vat: ''Wextê Xoverdayîşê Kobanê de MÎTî, îqtîdarê AKPyî û Dîyanetî provakasyon vet. Serekîya Karanê Dîyanetî kena ke DAÎŞî meşrû bikera. Ewro 3yê tebaxe serrgêra qirkerdişo ke DAÎŞî Şingal de kerdo ya. 3yê tebaxa 2014î de DAÎŞî zî sey Dîyanetî fetwayêke weşanabî.

 Ewro Dîyanet bi rolê DAÎŞî têgêreno. Dîyanet bi waştişnameyê xo sey DAÎŞî wazeno vajo 'qirkerdişê kurdan wacîb o.' Waştişnameyê Dîyanetî wayîrê ziwanê kîn û nefretî yo. Embazê ma yê tepişteyî bi serran o Dewaya Kobanê de vanê ke îqtîdar ho qesasê binkewtiişê DAÎŞî gêno. Ewro ma vînenê ke nê embazê ma heqdar ê.

Ma tîya ra dîyanetî rê vanê ke şima kam ê eşkenê kurdan rê heqaret bikerê. Xora ma zanayêne ke Dîyanet dişmenê kurdan o. Dîyanetî îşxalê Efrînî de bi Sûreya Fetîhî seba şerî veng dabî. Wexto ke cenazayê kurdan benê babete, Goristanê Garzanî pê makîneyan ame rijnayene, cenazayî binê rayîranê Kîlyosî de defin bîyî Dîyanetî vengê xo nêkerd. Dîyanetî wexto ke cenazaya Agîd Îpekî pê kargoyî erşawîyabî keyeyê ci zî vengê xo nêkerd. Dîyanetî pê bêvengîya xo sûcanê vera kurdan rê hemkarîye kerde. Coka ewro Dîyanet nêeşkeno qala exlaq, wayûbiratîye û erjanê ercîyayeyan rê behs bikero.''