Paytextê Almanya Berlin de çarçewa xebatanê weçînayîşî yê Partîya Çep a Keske de şayîyêke ameye viraştene. Şayîye de hêverî Endamê Koordînasyonê Weçînayîşî Huseyîn Yilmazî qisey kerd û beşdarî selam kerdî. Dima Hoza Kawa vejîya sehne ser.

Armenîyanê ke bi wesîleya serrgêra Qirkerdişê Armenîyan çalakîyêke kerdêne, seba paştdayîşî ê zî şîyî warê şayîye.

Serekê verênî yê Koma Meclîsî yê HDPyî Ahmet Yildirimî zî şayîye de pare kerd ke ê wazenê 100 wekîlan bişawê Meclîsî.

Yildirimî ra dima hunermende Mavîşe Guneşer vejîyaye sehne ser.

Serekê Rûmetî yê HDPyî Ertugrul Kurkçuyî şayîye de qisey kerd û vat: ''Seba binvistişê Erdoganî nê weçînayîşî ma rê firsend ê. Ewro wext wextê ney o. Hînî komel Erdogan nêwazeno. Erdogan şarî ra terseno.''

Namzeta Îstanbulî ya Partîya Çep a Keske Menekşe Kizildere zî roşanê beşdaranê şayîye fîraz kerd û vat ke roje roja çinkerdişê faşîzmî ya.

Wekîlê Die Linke Hakan Taşî beşdarî selam kerdî û vat: ''Ma tîya ra selamê xo şawenê Îmrali û Edîrne.''

Şayîye bi deyîranê hunermend Yaşar Kurtî qedîyaye.