Huseyîn Yildizo ke vera tecrîdkerdişê Ocalanî 104 rojî yo Den Haag de grevê vêşanîye de yo vat, “Mi waşt ke ez nê prosesê tarîxkî rê biba cewab û ez keyfweş a ke tewrê nê xoverdayîşî bîya.”
Seba wedaritişê tecrîdkerdişê Rayberê Şarê Kurdî Abdullah Ocalanî; Leyla Guvene 177 rojî, Nasir Yagiz 164 rojî, xoverdayoxê Strasbourgî û Îmam Şîş 138 rojî, girewteyê hepisxaneyanê Tirkîya û Kurdistanî de zî 139 rojî yo grevê vêşanî de yê. Xoverdayoxanê grevê vêşanîye ra yew zî Huseyîn Yildizo ke 104 rojî yo Den Haag de grevê vêşanîye de yo. Yildizî, dayîkê ke seba domananê xo yê ke hepisxaneyan de yê çalakîyan kenê silam kerdî û derheqê grevê vêşanîye de ANF’yî rê qisey kerd.
Ti verde eşkenî xo bide naskerdene?
Nameyê mi Huseyîn Yildiz o. 09.02.1963 de Dêrsim de ameya dinya. Mi wendegeho verên û mîyanên Pîlemûrîye de, lîse zî Dêrsim de wende. Fakulteya Fenî ya Unîversîteya Egeyî ra mezûn bîya. Mabênê serranê 1987-92 de Lîseya Mêrdînî de mi mamostayîye kerde. Serra 1992 sirgûnê Îslahîye ya Dîlokî bîya. Mabênê serranê 1992-95 de Lîseya Îslahîye de mamostayîye kerde.
Ti têkoşînê azadîye yê Kurdan key nas kerd?
Alî Haydar Kaytan û ez ma merdimê yewbînî yê. Dimeyo ke Alî Haydar Kaytan Enqera ra ame Dêrsim, mi zî têkoşînê azadîye yê Kurdan nas kerd. Bado zî mi heta na roje mi cayê xo mîyanê têkoşînê azadîye de girewt. Lîse û unîverseîte de tewrê xebatanê Têgêrayîşê Ciwanan bîya. Bado ke mi dest mamostayîye kerd, tewrê xebatê sendîkaye bîya. Zaf reyan ameya destbendkerdene. Serra 1988 de ameya girewtene û û ez eşta hepisxane. Serra 1990 de reya bîne agêra wezîfeyê xo yê mamostayîye ser. Mi xebatê sendîkaye heta serra 1995 dewam kerd. Bado zî raywanîya Ewropa dest pêkerde.
Ti key ameya Ewropa û tîya de se kerd?
Çeleyê 1995 de ez ameya Ewropa. Bado zî ameya Den Haag de ca bîya û hîna zî tîya ya. Tîya zî mi wextêk mamostayîye kerde. Wextê mamostayîye de zî û bado zî mi xebatê xo yê kulturî yê Merkezê Cimatê Demokratîkî yê Kurdan ê Den Haagî dewam kerdî û hîna zî dewam kena.
Ti senî qerar da û dest bi grevê vêşanîye kerd?
Dimayo ke hevala Leyla Guven dest pêkerd, mi zî waşt ke ez nê prosesê tarîxkî rê biba cewab. Bado wextêk na babete ser fikirîya, mi qerar da ke tewrê çalakîye biba. Ez keyfweş a ke tewrê nê xoverdayîşî bîya. Sere de Leyla Guvene û Nasir Yagiz, ez heme hevalê ke zîndanan û teber de xo ver ro danê û dayîkanê xoverdayoxan silam kena.
