21 mengî yo tepişteyanê Zîndanê Îmraliyî Rayberê Şarê Kurdî Abdullah Ocalanî, Hayrî Konar, Veysî Aktaş û Hamîlî Yildirim ra xeberêke nêna girewtene. Avûkatanê Buroyê Huqûqî yê Asrinî derheqê muwekîlanê xo de reyna muracatê Komîteya Vergirewtişê Îşkenceyî (CPT) kerd. Muracat de CPTyî ra ame waştene ke raporê xo yê zîyaretê 20-29ê êlule eşkera bikera.

Muracat de dîya zanayene ke heqê pêvînayîşî, mektub û îrtîbatî Îmrali de yenê binpaykerdene. Buroyê Huqûqî yê Asrinî ard ziwan ke rewşa ‘Incommunicado’ (nêgirewtişê agahîyan) Îmrali de giranêr bîya û rixmo ke 3 mengan de înan seba pêvînayîşî 32 reyan muracat kerdo cewab nêdîya înan. Muracat de wina ame vatene: ''Sere de dezgehê Ewropa, 22 welatan ra 350 avûkatan 14ê êlule de, 19ê êlule de Rojhelatê Mîyanênî ra 756 avûkatan muracatê Wezîrîya Edaletî kerd la muracatî nêameyî cewabkerdene. Aqîbetê mektubanê ke erşawîyayê nêzanîyeno. Reyna nêzanîyeno ke mektuba neweya ke 27ê êlule de erşawîyaya resaya yan nê.''

Eşkerayîye de ame vîrvistene ke menganê gulane, êlule û çeleyî de cezayê dîsîplînî dîyayê muwekîlanê înan la sebebê înan avûkatan de nêameyê parekerdene û bi nê hawayî zî heqê pawitişî ameyo binpaykerdene. Buroyê Asrinî pare kerd ke yew bingeyê qedexeyê pêvînayîşan çin o û nê birê qedexeyî bi temamî polîtîk ê.

Buroyê Huqûqî yê Asrinî vat: ''CPTyî derheqê zîyaretê xo yê peyênî de qet yew eşkerayîye yan zî raporêk nêda û çîyêk zî nêvat. Ganî CPT raporê xo yê serê zîyaretî eşkera bikero. Seke raporanê verênan ê CPTyî de dîyabi zanayene rewşa ‘incommunicado’ yena manaya canêardişê pêvînayîşan a. La CPT seba ke verê ney bigêro tênêgêreno. No zî derheqê tewirê CPTyî de şikan virazeno. Wina aseno ke zîyaretê înan teyna yew formalîte yo. Bi zîyaretê peyênî dewlete, selahîyetdaranê hukmatî û mehkemeyan ewnîyayîşê xo yê seba CPTyî nêvurnayo û no mesaj dayo: 'Seba ma yew qîmetê zîyaretanê şima yê rûtînan, rapor, tesbît û pêşnîyazanê şima çin o. Ma senî biwazê o qayde têgêrenê.' Hînî wextê ci ameyo ke cewabêko xurt bêro dayene nê tewirê bêhuqûqî, bêcidîyetî û keyfî.''

Dewamê muracatî de nê waştişî ameyî kerdene:

''Ganî komîte raporê xo û tesbîtanê xo yê serê zîyaretî 'cade' rayaumûmîye de eşkera bikera

-Seba ke avûkatî bieşkê pêvînayîşan bikerê ganî verê biranê bêhuqûqîyan ê mehkemeyan bêro girewtene.

-Seba ke keye û wasîyî bieşkê pêvînayîşan bikerê û nê pêvînayîşî tim dewam bikerê ganî şima verê cezayanê dîsîplînî bigêrê.

-Caardişê heqê zîyaretî reyde, ganî tepişteyî heqanê xo yê telefonî zî bieşkê bişuxilnê û ganî şima seba ney çîyêk bikerê.

-Seba ke tepişteyî bieşkê teber û avûkatanê xo de pê rayîrê mektub, telgraf û faksî xeberan bigêrê ganî şima astengîyan wedarnê.

-Ganî seba wedarnayîşê  qedexeyê rojname, kovar û kitaban şima têbigêrê.

-Ganî seba wedaritişê îşkence, kerdişanê xiraban û ‘incommunicado’ şima madeya 10/2 ya Peymana Heqanê Merdiman bîyarê ca.''