Goreyê dîmenanê ke medyaya dîjîtale de weşanîyayê, 26ê tebaxe de deweka Bameydanî ya dewa Hêlînî ya qezaya Farqînî ya Amedî de leşkeranê tirkan hêrişê xeyma keyeyêkê koçeran kerdo û tîya de gerîlayî qetil kerdê. Dîmenan de ame vatene ke koçerî zî bi îşkenceyî ameyê destbendkerdene.

Serebûtî ra dima ma xîret kerd ke çimeyanê herêmîyan ra agahîyan bigêrê. Goreyê agahîyanê ke nînan dayê, komêka dewijan waşt ke şora cayê serebûtî la leşkeran nêverdayo. 26ê tebaxe de hem dewijan hem zî rojnamegeran waşt ke agahîyan bigêrê la înan zî netîceyêke nêgirewte. 27ê tebaxe de ma wekîlanê Partîya Çep a Keske reyde şîyî cayê serebûtî û tay agahîyî vistî destî.

 Wekîlan Berdan Ozturk, Sumeyye Boz, Adalet Kaya, Omer Farûk Hulaku, Kamûran Tanhan û Zeynep Odûncû reyde ma sey rojnamegeran û rêxistinanê Amedî şîyî cayê serebûtî û rewşa xirabe fam kerde. Seke dîmenan ra yeno famkerdene teyna beşêkê warî ameyo vêşnayene. Ma dî ke malzemeyê keyeyê koçerî û çend pezê înan ameyê vêşnayene. Ma war de nîşaneyêka şerî nêdîyê. Seba ke war de nîşaneyêka şerî çin a, persa 'Gelo gerîlayî ameyê înfazkerdene' yena hişê merdiman.

Ganî sebebê şewatî bêro cigêrayene. Gelo adir seba vêşnayîşê keyeyê koçerî û gerîlayan ameyo tavistene? Yan zî leşkeran seba ke gerîlayî dormeyê xo nêvînê adir visto ta? Bi her hawayî zî war de gandaran dinyaya xo bedilnaya, malzemeyê koçeran vêşayê û dîmenanê roja verêne zî mojna ke gerîlayan ra yew erzîya mîyanê adirî.

Heyetê Partîya Çep a Keske ra Adalete Kaya cayê serebûtî de eşkerayîye daye û dîyar kerd ke înan nîşaneya şerî nêdîya la eşkera yo ke uca de qirkerdişêk ameyo kerdene. Heyet dima şi serweşîya keyeyanê gerîlayanê şehîdan. Cenazayê nê gerîlayan Dezgehê Tipê Edlîyî yê Amedî de yê û nêzanîyeno ke cenazayî do bêrê dayene keyeyan yan ney.