Tirkanê faşîstan verê Sersefîrîya Tirkîya ya Strasbourgî de bi nîşaneyanê ''bozkurt'' û ''rabîa'' weçînitoxê Partîya Çep a Keske provake kerdî û hêrişê înan kerd. Polîsanê Strasbourgî 3 welatperwerê kurdî destbend kerdî.
Şaristanê Strasbourgî yê Fransa de tirkanê faşîstan verê Sersefîrîya Tirkîya de bi nîşaneyanê ''bozkurt'' û ''rabîa'' weçînitoxê Partîya Çep a Keske provake kerdî û hêrişê înan kerd. Polîsanê Strasbourgî mudaxeleyê nîjadperestan nêkerd la 3 weçînitoxê kurdê ke raştê hêrişî ameyê, destbend kerdî.
Nameyê hîrê kurdan wina yê: Rojhat Oncel, Erhan Aktay, Selîm Eroglu.
Hemserekê NCDKyî Fîkret Çelîkî ard ziwan ke ê do rayîr nêdê faşîzmî û venga pêro welatperweran da ke verê sersefîrîye de kom bibê û seba raydayîşî seferber bibê.
