Karkerê Şîrketa Vilakerdişê Ceyranî ya Firatî (FEDAŞ) yê ke pabesteyê Enerjî Senî yê DÎSKî yê, vera meaşê kêmî û kêmîya asayîşê xebate 9ê tebaxe ra nata çalakîya karşenikkerdişî kenê. 

Karkerî her çiqas wazenê ke mudaxeleyê erizayan bikerê FEDAŞî nînan ra mefteyê wesayîtan girewt.

Narey zî FEDAŞ aboneyanê xo rê pê mesajanê telefonî karkeran hedef mojneno.

FEDAŞî mesaj de wina vato: ''Çalakîya karkeran bena sebeb ke şarê Dêrsimî bê ceyranî bimano. Nê çalakîyî resayê a aste ke zerar danê şarê ma û embazanê ma yê ekîban.''

FEDAŞî mesajê xo yê bînî de zî wina vato: ''Qezaya Pilemûrîye de karkeranê çalakîkeran hêrişê ekîba ma kerd ke ekîba ma şîyêne mudaxeleyê erizaya ceyranî. Nê çalakîkeran heqê ceyrangirewtişî yê şarê ma asteng kerd.''