Rêza Erzurum (Ridvan Îpek) Brûsk Dêrsimî reyde 4ê êlula 2015î de Dêrsim de vera qereqolê Polîsan ê Nafî Karabulutî çalakîya fedayîye kerdbî û şehîd bibi. Babîyê ey Rasîm Îpekî ANFyî rê serrgêra şehadetê ci de qala lajê xo Rêzan Erzurumî kerde.

Rêzan Erzurum 1992 de dewa Qirimkaya ya qezaya Qereçobanî ya Erziromî de dadîya xo ra beno.

Rasîm Îpekî da zanayene ke domanîya ci de her kesî Rêzanî ra zaf hes kerdêne û vat: ''Rêzan lajê min o diyîn bi. Ey her kesî ra zaf hes kerdêne û her kes de pêkerdêne. Çar domanê mi û şeş domanê birayê mi est bîyî. Rêzan verê înan de zaf hol têgêrayêne. Rêzan dima şi dibistane la mamostayan de pênêkerd û qiseyê înan qebul nêkerd. Ey dibistane teriknaye, şi Îstanbul de xebitîya. 

Îstanbul de o tewrê xebatanê ciwanan bîyo. Polîsan rojêke o tepişt û îşkenceyê ci kerd. Çend reyî wina bi. Ma nê çîyî nêzanayêne. Mi ey rê vat ke wa bêro tîya la ey qebul nêkerd. Têkilîya mi û ey sey babî û lajî ney sey embazan bîye. Ey dadîya xo ra zî zaf hes kerdêne û tim aye rê deyîra 'Dil dixwaze here cengê' vatêne.

4ê êlula 2015î de ez serê sibayî werişta la zerrîya mi de yew ters est bi. Ez şîya merkezê Bremenî. Lajê min ê qijî Memoyî mi rê telefon kerd û vat 'Merkezê Dêrsimî de şer bîyo, mi dîmenî seyr kerdî. Yewê înan maneno kekê mi.' Ez şîya keye, ewnîyaya televîzyonî ra. Mi dî ke Rêzan o. 

Ez cade Almanya ra şîya welatî. Ma şîyî Meletî. Cenaza 10-12 rojan uca de mende. Dima nêmeyê şewe de cenaza ameye teslîmkerdene. Ma sereyê Xarpêt û Çewlîgî ra şîyî heta Gimgimî. Ma a şewe Gimgim de mendî. Leşkeran nêverda ke ma şorê. Serê sibayî ma cenazaya xo girewte. Şarê kurdî rayîrî girewtbi. Gimgimî ra heta Xinis û Qereçobanî şarê ma rayîran de bi. Leşkerê tirkî û polîsî zî peyê ma ra pê wesayîtanê zirxînan ameyêne. Heta nêmroje ma cenaza berde dewe. O çax babîyê mi zî weş bi. Babîyê mi zî Rêzanî ra zaf hes kerdêne. Ma cenazaya xo defin kerde. Roja definkerdişê Rêzanî de şaristan de çew nêmend, her kes tewrê merasîmî bi. Nasê ma zî nenasî zî her kes cenaza de bîyî. 

Serrgêra 8. ya şehadetê lajê min a. Rêzan do tim zerrîya ma de bimano.''