Fîlozofo Macar Gaspar Mîklos Tamasî pare kerd ke Serekkomaro Tirk Tayyîp Erdogano ke 7ê teşrîna peyêne de zîyaretê Macarîstanî do biko, seba hêrişanê verba Kurdan ganî bêro şermezarkerdene.

Tamasî vat: "Ma pêro zanenê ke Erdogan û artêşa Tirkî bi hewayêkî qirkerdeyî hêrişê Kurdanê Sûrîye keno. Ganî ma xo vîr a nêkê ke verba Erdoganî û hîleyanê ey her cephe de têkoşîn dewam keno. Ma Budapeşte de na rewşe şermezar kerde û 7ê teşrîna peyêne de ke Serekkomaro Tirkî Erdogan do verê xo bidê Macarîstan û Serekwezîrê Macarîstan Orban zî bi hewayêkê bêhurmetî meymandarîye bike, ganî ma carêka bîne ey şermezar bikê. Meseleyo bingeyî no yo ke cinî û camêrdê ke nîyetê înan xalîs ê, ganî pêroyê dinya de paşt bidê şerê Kurdan. Hukmatê ke nê wexto zehmetên de Kurdan têna verdenê, do bedelê ney bidê. Wextê hesabdayîşî nêzdî yo."