Rêxistina Partîya Çep a Keske ya Mersînî vizêr bi beşdarîya sîyasetmedar Ahmet Turkî derheqê xebatanê weçînayîşî de rêxistinanê komelê sivîlî û rîsipîyan reyde kombîyayîşêk kerd. Ahmet Turk, namzedê Partîya Çep a Keske yê Mersînî, îdareyê HDP û xeylêk temsîlkarê rêxistinan tewrê kombîyayîşî bîyî.

Hemserekê HDPyî yê Mersînî Hoşyar Yildizî hêverî qisey kerd û ard ziwan ke bi se serran o kurdî polîtîkayanê qirkerdiş û îmha de têrî yenê. 

Dima sîyasetmedar Ahmet Turkî bale ante ser ke nê weçînayîşî seba bindestan firsendê tarîxî yê û vat: ''Ez pê bawer a ke şarê ma nê weçînayîşan de seba wedaritişê sîyaseto ke heta nika ameyo kerdene û seba wedaritişê polîtikayanê teda û înkarî cewabê hewceyî bido. Meseleya kurdan helbet meseleya Tirkîya ya tewr pîle ya. a raşte Tirkîya de meseleya demokrasî est a. Eke ma demokrasî nê welatî de mende bikerê, meseleya kurdan zî tede pêro meseleyî do çareser bibê.''

Turkî pare kerd ke tedayê hukmatî yê vera komelî her ke şino zêdîyenê û vat: ''Çareserîyî demokrasî ra derbaz benê. Ma bi serran o sîyasetî kenê. Bi taybetî şarê kurdî nê rayîrî de bedelê giranî dayî û hema zî dano. Seke şima zî zanenê serranê 90an de Newrozan de merdimî ameyî qetilkerdene. Nê polîtîkayî ewro zî dewam kenê. Ewro 10 hezar embazê ma yê sîyasetmedarî zîndan de yê. Ganî ma vera nê faşîzmî seba ameyoxêkê demokratîkî bêrê yewca.''