Wekîla Partîya Çep a Keske ya Sêrtî Sebahate Erdogan Saritaş derheqê prosesê Peymana Lozanî û erkanê kurdan de ANFyî rê qisey kerd.

Saritaşe ard ziwan ke Peymana Lozanî de kurdî çin hesibîyayî, raştê polîtîkayanê înkar, îmhar û qirkerdişî ameyî û ganî na rewşe bi hawayêkê tarîxî dewletanê îmzadaran rê bêra vatene. Saritaşe îfade kerd ke şertê seserra 20. û ê seserra 21. heman nîyê. Îmzadarê na peymane mesuldarê qirkerdişê kurdan ê. Bi taybetî Îngilîstan û Fransa ganî rolê xo yê na peymane bivînê, seba çareserîya meseleya kurdan game bierzê.

Peymana Lozanî çimeyê neçareserkerdişê meseleya kurdan o. Nê dewrî de ganî her kes vera na peymane tewirê xo bimojno. Bi na peymane kurdî bêstatu ameyî verdayene, kurdkî ameye qedexekerdene û kurdî ameyî asîmîlekerdene. Meseleya kurdan hetê cewherî ra meseleya azadî û heqanê merdiman a.''

Saritaşe vist vîrî ke meseleya kurdan ra Tirkîya se serrî yo nêeşkena aver şora û vat: ''Tirkîya de bingeyê pêro meseleyan de meseleya kurdan est a.Kurdî wazenê Tirkîya de haştîya komelkî bêra caardene û komara demokratîke awan biba. Welatanê demokratîkan de nê waştişî mehqûl ê. Qebulnêkerdişê nînan û çaresernêkerdişê meseleya kurdan zerar danê Komara Tirkîya. Kurdî ganî neheqîya ke bi Peymana Lozanî înan rê ameya kerdene pêro dinya û şarê Tirkîya rê vajê. Seba ke na neheqîye biqeda û çareserîye bêra caardene ganî kurdî dewletanê dinya û rêxistinanê mîyanneteweyîyan rê bi hawayêkê hîrayî qala mesele bikerê. Meseleya kurdan meseleyêka polîtîk a coka çareserîya ci zî polîtîk a.''