Tepişteyê dewaya PKK û PAJKî 27ê teşrîna verêne ra nata çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de grevê vêşanîye kenê. Seba paştdayîşê grevê vêşanîye xeylêk şaristanan de zî Nobetê Edaletî yenê kerdene. 

Dadîyanê Nobeta Edaletî ya Amedî derheqê çalakîya xo de ANFyî rê qisey kerd.

Dayîke Meryeme Soyluya ke kênaya ci Amîne Kaya Zîndanê Bakirkoyî de tepişte ya vat: ''Teda û tecrîdê zîndanan zaf giran ê. Dişmen wazeno tecrîdê vera Rayberîye her kesî rê ferz bikero. Ganî her kes bizano ke mefteyê haştîye û azadîye Rayber Apo yo. Heta ke Rayber Apo azad nêbo şarê Tirkîya û Rojhelatê Mîyanênî do azad nêbê. Ewro her kes mîyanê tecrîdî de yo. Ez venga pêro kurdan danê ke xizmetê dişmen û sîstemî mekerê. Bêrê ma yew bibê û peynîya zulmê vera tepişteyan bîyarê.''

Dayîke Esma Seydaoglu vat: ''Ez sey dadîyêka kurde seba paştdayîşî tîya de ya. Ez ewro seba paştdayîşê merdimatîye, haştîye, edalet û azadîye tîya de ya. Wa pêro kurdî paştî bidê na çalakîye. No xoverdayîş seba edaletî yo. Eke edalet bêro caardene her kes do azad bibo.''

Dadîya tepişteyê nêweşî Sulhîye Saruhan vat: ''Armancê tepişteyan şiknayîşê tecrîdê vera Rayber Apoyî yo. Ewro tecrîdê vera Rayber Apoyî vera pêro şarê kurdî yeno kerdene. Înfazê domananê ma yeno vêşnayene û hucreyê yewkesî de tepişîyenê. Ma edalet û têdûştîye wazenê. 3 serrî yo Rayber Apoyî ra xeberêke nêna girewtene. Ma teyna wazenê ey ra xebere bigêrê.''

Dayîke Aklîme Hanas vat: ''Heta ke tecrîdê vera Rayber Apoyî nêro wedaritene ma Nobeta Edaletî rê dewam bikerê. Ma ewro seba şiknayîşê tecrîdî tîya de yê. Ma wazenê Rayberê ma azad bibo. Domanê ma zîndanan de bi bedenanê xo xo ver danê. Ma wazenê ke waştişê înan wa bêrê caardene.''