Hemserekê Partîya Herêmanê Demokratîkan (DBP) a Wanî Harun Okayî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Okayî vist vîrî ke Rayberê Şarê Kurdî Abdullah Ocalanî 1999 de bi komployî tepişîyayo û 24 serrî yo tecrîdkerde yo.  Okayî îfade kerd ke astengkerdişê pêvînayîşanê bi Abdullah Ocalanî zerarêko pîl dano haştîya komelkîye û no kerdiş bêhuqûqî yo.

Okayî vat: ''Huqûqo mîyanneteweyî û huqûqê zereyî yenê binpaykerdene. Haştîye de rolê Abdullah Ocalanî zanîyeno. Serra 2015î ra nata mîyanê tecrîdî de tecrîd Birêz Ocalanî rê yeno kerdene. Ganî tecrîdê vera Abdullah Ocalanî cade bêro qedînayene. Eke no bêro kerdene dişmenîya ke mîyanê komelî de aferîyayo, zî do biqeda.''

Okayî dîyar kerd ke astengkerdişê pêvînayîşanê bi Rayberê Şarê Kurdî Abdullah Ocalanî dûştê huqûqî yo û vat: ''Ganî Birêz Abdullah Ocalanî bieşko heqanê tepişteyan ra îstîfada bikero. Seba caardişê haştîya komelkîye ma venga şaranê Tirkîya danê ke babeta wedaritişê tecrîdî de hişyar bibê.''