Polîsan hêrişê çalakwanan kerd 20 kesî destbend kerdî

Polîsan hêrişê merdimanê tepişteyanê ke waştêne vernîya Zîndanê Gebze de çalakîya roniştişî virazê kerd, hemsereka HDP’yî ya Stenbolî Esengul Demire zî tede 20 kesî destbend kerdî.

Merdimê tepişteyanê ke semedê paştdayîşê domananê xo waştêne vernîya Zîndanê Gebze de çalakî virazî, rayştê hêrişê polîsan ameyî. 20 kesî ameyî destbendkerdene.

Merdimanê hepsîyan semedê baleantişê grevê vêşanîye yê ke semedê wedartişê  tecrîdê serê Rayberê Şarê Kurdî Abdullah Ocalanî yenê viraştene, waşt ke vernîya Zîndanê Gebze de çalakîya roniştişî virazî. Polîsan dekewtişê bajarî de hêriş kerd. Hemsereka HDP’yî ya Stenbolî Esengul Demire zî tede 20 kesî ameyî destbendkerdene. Çalakwanî bi sloganê, ‘Biciwîyo Xoverdayîşê Zîdanan‘ qirayî. Polîsan semedê vengê înan birnayîşî ê derb kerdî. Dorme ra hemwelatijanî zî vera hêrişê polîsan reaksîyon ramojna.