Demê kilmî de hunermend, akademisyen û pawitoxê heqanê merdiman zî tede 61 kesan Fransa de vera tecrîdê serê Rayberê Şarê Kurdî Abdullah Ocalanî Komîteya Vergirewtişê Îşkenceyî yê Ewropa (CPT) rê mektûb şawit. Îmzakerdoxanê mektubî ra endama Meclîsê Şaredarîya Parisî û serêka verên a Rêxistina Êfu ya Mîyanneteweyî ya Fransa Genevieve Garrigos rewşa Îmraliyî ANFyî rê erjna.

Genevieve Garrigos tecrîd sey îşkenceyê giranî û sûcê vera merdimîye name kerd û nê vatî: ''Şertê tecrîdî hem tesîrê weşîye û hem zî tesîrê psîkolîya merdiman kenê. Şertê Abdullah Ocalanî rewşêka zaf giran a. Tecrîd sey îşkence û qesasgirewtişî yeno caardene. Ma nê zanê nê kesî zîndan de yê ya nê, rewşa înan senîna, ciwîyenî ya nê. Ocalan û embazanê ci ra xebere nîna girewtene. No sûcê vera merdimîye yo ke bi zorî vînîkerdiş o. Hukmatî Tirkîya ganî cade tecrîdî wedaro. Tewirê dewleta tirke ramojneno ke beno ke Îmrali de problemo gird est o. CPT raporê xo eşkera mekero zî ganî reyna Îmraliyî zîyaret bikero.

Ewropa semedê menfeatê xo nêşina Tirkîya ser. PKK hetê tay dezgehan ra sey rêxistina terorî bêro vînayene zî têkoşînê vera DAÎŞî yê Rojawan de heme dinya qehremmanîya kurdan dîye. Kurdî gama ke vera DAÎŞî şer kenê hetê Ewropa ra sey qehremanî yenê vînayene la  gama ke semedê  xopawitişî vera dewleta tirke têkoşîn kenê  sey koma terorî yenê vînayene. Ewropa nêeşkena na dirîtîya xo zafêr bidomno. Ma nêeşkenê kurdan bikerê qûrbanê dîktarorîya tirke û eynî kurdan ra biwazê ke wa vera DAÎŞÎ şer bikerê. Hukmatê Ewropa û Konseya Ewropa deyndarê kurdan ê, ganî înan bipawê.''