Gerîlaya YJA Starî Şengule Bulut birîndare ameya tepiştene. Keyeyê Bulute 8 rojî yo nêeşkeno kênaya xo ra xeberê bîgêro.

Wezîrîya Pawitişî yê Tirkî hesabê xo yê medyaya sanale de pare kerd pêkewtişê Başûrê Kurdîstanî de di gerîlayî şehîd bîyî û Şengule Bulut (Marya Umut) birîndare ameye tepiştene.

Babîyê gerîlaya YJA Starî Bulute, Abdulhalik Bulutî vat roja ke xebere ameye parekerdene kesêkî nimreyê xerîbî ra ey rê telefon kerd û persa ke kênaya ci ra xebera ci est a ya nê. Bulutî vat ey  eynî nimreyî ra peyser telefon kerd û semedê kênaya xo persayo û musayo ke kênaya ci birîndare ameya tepişene la înan cayê aye nêvato.

Babî Bulutî eynî roja muracatê Serdozgerîya Dîyarbekirî kerd la derehqê aqibetê kênaya xo de zanayîş nêfîna dest. Babî Bulutî 11ê tebaxe de semedê paştdayîşê huqûqî muracatê Komeleya Heqanê Merdiman a Amedî kerd.

Bulutî vat kênaya ci 2013 şîya û 9 serrî înan aye ra qet xeberêke nêgirewte. Bulutî ard ziwan ke ê semedê cuya kênaya xo qerqilîyenê û vat: ''Ma qet xeberêke nêgenê. Ça de yena tepiştene, ça de yena tedawî kerdene, ça de do bêro muhakemekerdene ma nêzanê. Ma kam berî cinenî dozger û selahîyetdarî zanayîş nêdanê.  Ma sey keyeyî zaf mexdûr ê. Ez wazena aqibetê kênaya xo bizanî. Ma nika nêzanê weş a, birîndar a, ma qesawet kenê.''