Wan û qezayanê ci de seba ke tedbîrî nênê girewtene emser 11 kesî Gola Wanî de xeniqîyayî. Dormeyê Gola Wanî cara hetê dezgehan, dikanan û cayanê polîs û leşkeran ra girewte yo. Coka şar neçare maneno ke cayanê tehlukeyînan ra bikewo awa Gola Wanî.

Emser Muhammet Kabîr Pacal (16) taxa Eganîsî ya Erdîşî de, Firat Eker (21) qezaya Tûşba ya Wanî de, Mazlûm Genez (21), Saadettîn Çekmen (27), Polat Ozîster (16), Muhammed Gurhan (14) û Berkay Ozîster (14) gole de xeniqîyayî. 4 kesê bînî zî gole de xeniqîyayî la nasnameyê înan nêameyî tesbîtkerdene.

Hemvervatoxê Ekolojî yê HDPyî yê Wanî Mesut Borî dîyar kerd ke cayê ke çem herikîyeno gole teng ê û coka tede rîsk zaf o. Borî da zanayene ke seba ke qeraxê Gola Wanî girewte yê şar şino cayanê birîskan ra dekeweno awe. Borî vat: ''Ma vînenê ke AFAD, DSÎ û şaredarîye tedbîran nêgênê. Sebebê nê xeniqîyayîşan peygoşî ya û mesuldarê ci zî AFAD, DSÎ û hêzê asayîşî yê.''