Grûbê ke Frankfurt, Parîs, Belçîka û Stuttgart ra ameybî û sîyasetkaro Kurd Bedrettîn Kavak, SYKP ra Tuncay Yilmaz û KKP (Partîya Komunîste ya Kurdistanî) ra Kemal Bîlgîtî şî serdana çalakwanan. Zîyaretkerdoxan ANFyî rê qisey kerd.

Bedrettîn Kavak: Amacê na çalakî şikitişê tecrîdî yo û waştişê weşî û azadîya Rayberê Şarê Kurdî Abdullah Ocalanî yo. Tecrîd perçeyêkê konseptê şerê hemverê şarê Kurdî yo. Çalakî heman wextî de ramojnena ke ma felsefeya cuya pîya ya Rayberê Şarê Kurdî Abdullah Ocalanî rê wayîr vejênê. Bi dîplomasî ganî ma netîce bigîrê.

P-KANN ra (Platforma Kurdên Anatolîa Navîn) Omer Koyuncu: Ez na çalakîya hemraya xo û hemşehrîya xo Leyla Guvene silam kena. Ma do tewrê her tewir çalakî û aktîvîteyê ke seba wedartişê tecrîdê serê Rayberîya ma yenê viraştene bibê. Ez veng dana Kurdanê Anatolîya Mîyanêne û heme şarê Kurdistanî ke wa bi hawayêkê xurtî na çalakîye rê wayîr vejîyê. Ganî ma nêkerê xo vîr ra ke azadîya Rayberîye azadîya şarê Kurdî ya.

Îsmaîl Bozukluhan: Ez bawer kena ke do şarê Kurdî dorê Rayberîya xo de bêro têhet û bi mucadele xelasîye bidest fîno. Ganî ma çalakîya Leyla Guvene rê wayîr vejîyê û heta netîce bêro girewtene çalakîyanê xo bidomnê.

Ferhat Gumuşboga: Çalakîya Leyla Guvene Kurdistan ra hemeyê Ewropa de vila bî. Şarê Kurdî de umîdêko pîl virazîya. Bawerîya ma tam a ke do çalakî bireso amacê xo. Grevê vêşanîye yo bêdem-bêagêrayîş seba şarê Kurdî rûmetêko pîl o, şerefêko pîl o. ganî nêro vîrrakerdene ke tecrîdê serê Rayberê Şarê Kurdî Abdullah Ocalanî tecrîdê serê şarê Kurdî yo.  

Kemal Bîlgît: Şikitişê nê tecrîdê gureyo hempar ê mucadeleyê şaranê Kurdistan û Tirkîya yo. Çunke gureyêkê ma yo bingeyên esto ke ma faşîzmê dewleta Komara Tirkîya vindarnê. Tirkîya de cimat hendî nêeşkeno nefes bigîro. Rayîrê nefesî şiktişê tecrîdê serê Rayberê Şarê Kurdî Abdullah Ocalanî yo.

Tuncay Yilmaz: Ez tîya ra wazena vengdayîşêk bikerî. Şarê Kurdî bi paradîgmaya Rayberîya xo seba aşitîya Kurdistan û Rojakewtena mîyanêne çi destê ci ra yeno keno. Vengdayîşê mi qey şaranê Tirkîya yo. Eke şima ameyoxê xo û cuya xo fikrênê ganî formulêk seba aşitîya Kurdan dir bivînê. Ganî ma formulêk seba înan bivînê ke waştişê înan ê cuya azad û seypêye bica bêro. Naye ra seba wedartişê tecrîdî çi lazim o ganî ma bikerê.

Vengdayîşê min o dîyin zî seba Ewropa yo. Eke şima binê hêrişanê DAÎŞî de nêmendê û koçberîyê pîlî ver bi welatê şima nêvirazîyayê no sayeyê mucadeleyê şarê Kurdî yê Rojava yo. Na yewe ra Ocalanî rê wayîrvejîyayîş û şiktişê tecrîdê serê Ocalanî tenya yew şarî rê paştîdayîş nê heman wextî de seba şaranê Ewropa zî meseleyêkê estbîyayîş û çinbîyayîş o.