Grevê vêşanîye yê tepişteyanê dewaya PKK û PAJKî roja 5. de seba azadîya Rayberê Şarê Kurdî Abdullah Ocalanî û çareserîya meseleya kurdan dewam keno.

Tepişteyan 27ê teşrîna peyêne de bi eşkerayîyêke grev dabi destpêkerdene. Eşkerayîye de wina amebi vatene:

''Coka ma do hêverî mabênê tarîxanê 27ê teşrîna peyêne û 15ê sibate de bi grevê vêşanîye yê bidorî tewrê Hemleya 'Abdullah Ocalanî rê Azadîye, Meseleya Kurdan rê Çareserîye' bibê. Her zîndan de embazê ma planê hûmara kome û çalakîya grevî dîyar bikerê. Embazê ma yê kokim û nêweşî û êyê ke cezayê înan di serrî mendî do tewrê çalakîye nêbê. Hetê bînî ra çarçewa çalakîya xo de ma do dezgehan, rêxistinanê komelê mîyanneteweyî, partîyanê sîyasîyan û temsîlkaran rê mektuban bişawê. Ma do Wezîrîya Edaletî ra bi waştişnameyan biwazê ke Îmraliyî rê bêrê sewqkerdene. Na çarçewe de ma CPTyî rê zî do mektuban bişawê. Ma do mehkemeyan de sîstemê tecrîdî teşhîr bikerê. Ganî pêro embazî goreyê bernameyê grevî têbigêrê û bi hawayêkê şexsîyî tênêgêrê. Ma venga pêro keyeyanê xo, şarê ma, dormeyanê demokratîk û şorişgêran, dostanê xo danê ke tewrê Hemleya 'Abdullah Ocalanî rê Azadîye, Meseleya Kurdan rê Çareserîye' vejîyê.''