Wekîla HDPyî ya Îstanbulî  Zuleyha Gulum vat îqtîdar bi cîyatîya ke keno û nêgirewtişê tebdîranê qîmkerdeyan zîndanan de eşkeno bibo semedê mergê zaf merdiman.

Wekîle Guluma ke huqûqnas a ANFyî reyde qisey kerd vat  şertanê normalan de baroyî, dezgehê heqanê merdiman û rêxistinê cinîyan tewrê amadekerdişê qanûnî yê caardişê ceza biameyêne kerdene. Gulume ard ziwan ke dima ke vînayîşê komelî ameye girewtene û vînayîşo hempar ame parekerdene ganî vurnayîş biameyêne kerdene û vat: ''Amadekerdişê nê prosesî sey her rey antî-demokratîk o. Dezgehê ke na babete de xebitîyenê sey çinbîyayeyî ameyî hesibnayene û ma vînenê ke seba tepişteyanê sîyasîyan vurnayîşêk nêame kerdene.''

Gulume bale ante bêtêdûştîya qanûnê caardişê ceza yê verênî yê Tirkîya ser û da zanayene ke mehkeme sey mekanîzmeyêkê seba ereykerişê muxalefetê komelî xebitîyena. Gulume bi taybetî bale ante cezayanê dîsîplînî yê tepişteyanê sîyasîyan ser û vat: ''Na ceza bêbinge û bêhuqûqî ya. Bi nê hawayî şertê veradayîşî ame binpaykerdene. Veradayîşê bi kontrolî nêame kerdene.
Hûmara tepişteyan kapasîteya zîndanan ra zaf zêdêr a, tedayê keyfîyî yenê kerdene, heqê merdiman yenê binpaykerdene. Bi hezaran tepişteyê nêweşî estê. Rîxmê raporanê Tipê Edlîyî zî tepişteyî nênê veradayene. Vurnayîşo ke îqtîdarî kerd netîceya kîn û nefretê vera muxalefetê sîyasîyî yo. Seba mafya, cergan û tecawuzkeran efû yena caardene. Bi nê hawayî nêno qebulkerdene.''