Gunaye: Ma semedê cuyêka newîye weçînayîşêkî pêşkêş bikerê

Vervatoxa HDPyî Ebru Gunay: ''Rewşa Tirkîya seke lokomotîfêk o ke ver bi felaketî bi lezî şino. Ma amadekarîye kenê ke şaran rê semedê cuyêka newîye weçînayîşî pêşkêş bikerê.''

Vervatoxa HDPyî Ebru Gunay bînaya merkezî ya HDPyî de pê kombîyayîşêk rojdem ercna. Qiseykerdişê Gunaye ra beşêk wina yo:

''Temrînê neweyî yê perwerdeyî de kurdkî reyna ziwano qedexe yo. Sîstemê perwerdeyî hema zî têdûşt, zanistî û bêpere nîyo. Coka ganî semedê çareserîya nê meseleyan planê çalakîyan o lezabez bêro kerdene.

Rewşa Tirkîya seke lokomotîfêk o ke ver bi felaketî bi lezî şino. Ma amadekarîye kenê ke şaran rê semedê cuyêka newîye weçînayîşî pêşkêş bikerê. Ma pêro hamnanî meseleyanê şarî û welatî de eleqedar bîyî, nîqaşî kerdî dima zî ercnayîşê xo kerdî. Ma venga dezgehê sîyasetî danê ke meseleyan cade çareser bikero.

20ê êlule serrgêra cînayetê Musa Anterî ya. Ganî cînayetê ey sey cînayetanê bînan bêro roşnîkerdene. Vizêr Apê Musa hedef bi ewro Denîze Poyraz hedef de bîye. Ma na hîşmendîye hol şinasnenê. Dewlete bi xo sereyê nê cînayetan girewt. Ma semedê roşnîkerdişê nê cîyanetan heta peynî xo ver bidê û hesabê ci bipersê.

Nê welatî de hema zî Destûrê Bingeyî yê Darbe faal o û weçînayîşî zî goreyê nê qanûnan yenê kerdene. AKP-MHP semedê menfaatanê xo û goreyê menfaatanê xo qanûnan vurnenê. No zî fotografê bêçaretîya înan o. Şima eşkenê qanûnanê weçînayîşî bivurnê la 7ê hezîrane xo vîr a mekerê!

Rojdemê HDPyî de weçînayîşan ra zêdêr meseleya demokrasî û heqanê merdiman a Tirkîya esta. Verî ganî meseleya demokratîkbîyayîşî bêra çareserkerdene. Partîya ma de hema weçînayîşî ser o nîqaşî nênê kerdene.''