Hetkara Hemserekanê Pêroyî yê HDPyî Ozleme Gunduz ANFyî rê xebatê partîya xo û netîceyê kombîyayîşan ercnayî.

Gunduze nê vatî: ''Kombîyayîşanê ma de raştîya tengayîya ma ya polîtîk û îdeolojîk hetê şarî ra zelal vejîyaye werte. Vînkerdişê wekîlan muhîm bi la çîyo tewr muhîm  zehîfbîyayîşê xeta ma ya îdeolojîk bi. Ame vînayene ke ma xeta rayîrê hîreyînî de peyd mendî û ganî ma zafêr goştarîya şarî bikerê. Ame rexnekerdene ke sere mekanîzmaya qerarî de xeylêk babetan de şar hend tewrê prosesî nêbeno. No rexnekerdişo heqdar bi.  Ma pê bawerê ke bi têkoşînê hemparî ma eşkenê ser bikewê. Ma bi bedalanê girdan  û têkoşînê demokrasîyî yê şaran heta ewro ameyî. Şarê ma polîtîk û rêxistinkerde yo.

Kombîyayîşan de rexneyê zaf muhîmî ameyî kerdene ke nê do verê ma roşnî bikerê. Şar wazeno wa sîyasetê ma yê meclîsî ra heta têkoşînê kuçeyan zaf çî bêro bedilnayene. Şar sîyaseto temsîlî nêwezano. Coka ame vîrardene ke HDP/ Çepa Keske mîyanê têgêrayîşanê şarî, mîyanê têgêrayîşanê şorişgêran de zîl da. Ame vatene  ke wextê vîjnayîşê vernamzedan de ganî fîkrê şarî dahîna zaf bêro goştarîkerdene.

Reyna ame waştene ke wa merkez-herêmî pabeste têbigêrê. Bale ameye antene muhîmîya Îtîfaqê Kede û Azadîye  û Îtîfaqê Demokrasî û Azadîye yê Kurdan ser û ame vatene ke ganî nê wird îtîfaqî bêrê xurtêrkerdene. Ma do xoverdayîşî xurtêr bikerê. Ganî ma rayîrê hîreyînî zafêr esas bigêrê. Ganî bi nameyê şaranê bindestan sîyaseto xoser bêro rayraberdene. Ma sey partîya ke xeta ci ameya zixmkerdene têkoşînî rê dewam bikerê. Kongre de ame waştene ke wa nameyê partîye bêro bedilnayene. Ma nê ercnenê. HDP do estbîyayîşê xo bidomno la ma do dewrê neweyî de têkoşînê xo Partîya Çep a Keske de bidomnê.''