Hatîce Çakmak 1993 de qezaya Tetwanî ya Bedlîsî de bi hawayêkê birîndarî amebî tepiştene û cezaya muebede dîyabî ci. Hatîce Çakmak rixmo ke cezaya ci ya 30 serran qedîyaya vera nêdîyena. Hatîce Çakmaka ke tede kîstê rahîmî est o, bi bahaneya cezaya hucreyî înfazê ci ame vêşnayene û a do 6 serran ancî zîndan de bimana.

Dadîya Hatîce Çakmak Cahîde Çakmak derheqê babete de ANFyî rê qisey kerd.

Dayîke Cahîde Çakmak da zanayene ke kênaya ci îşkenceyê giranî dîyê û vat: ''Kênaya mi Zîndanê Alanya yê Antalya de tepişîyena. Nêweşîyanê xo ra serrêke û nême ra nata teyna rayêke ez şîya zîyaretê aye. Kênaya mi seba ke kurd a nêna veradayene. Kênaya mi rê poşmanîye yena ferzkerdene. Kesê tecwuzkerî, kiştoxî û dizdî vera dîyenê la domanê ma raştê cezayanê 30 serran yenê. No zulm o. Tepişteyê nêweşî û êyê ke cezayê înan qedîyayê wa cade vera bidîyê.''

Cahîde Çakmak ard ziwan ke ê edaletî wazenê û vat: ''Başûr û Rojawan de çi karê tirkan est o? Domanê ma her roje kişîyenê. Na rewşe do heta key dewam bikera? Hînî bes o. Meseleyî bi şerî çareser nêbenê. Ganî pêro partî û dezgehî seba tepişteyan yew bibê. Ganî ma cayê xo de nêvinderê, wayîrê tepişteyan vejîyê.''