Hemsereka Pêroyî ya Partîya Demokrasîyî û Têtûştîye ya Şaran (DEM Partî) Tulaye Hatimogullari  çarçaweya xebatanê weçînayîşî de qezayanê Farqîn û Bimîlî yê Amedî de şarî reyde ameye têhet.

Bado ke Farqîn de bi konvoyî tûr ame eştene şar verê Quleyê Saete de amet têhet û bi muzîkî  govende girewte. Dima ra namzedanê Şaredrîya Farqînî Kadrî Esen û Sevîme Biçici û namzedanê Şaradarîya Bajarê Pîlî ya Amedî Serra Bucak û Dogan Hatunî şar selam kerd.

Hemsereka Pêroyî ya DEM Partî Tulaye Hatimogullari  zî şar bi kurdkî û erebkî selam kerd. Hatimogullari gama ke qala mîgîngê Îstanbulî kerdêne ke semedê wedaritişê tecrîdê Îmraliyî û çareserkerdişê meseleya kurdan amebi kerdene, polîsan bi anonsan kerd ke vengê aye bibirne.

Hatimogullari vera nê wina hêrsê zo ard ziwan: ''Êyê ke tîya anons kenê wa bizanê ke ma xebata weçînayîşî kenê. Polîsî nêeşkenê mudaxaleyê weçînayîşî bikerê. Wa Anqara, AKP û Erdogan bieşnawê. Polîsanê ke dormeyê ma girewto ez venga înan dana; Eke şima vanê 'ma weçînayîşê demokratîkî kenê' şima nêeşkenê vengê hemsereka partîyêke bibirnê. Ma ewro tîya vînenê ke AKP senî hazîrîya weçînayîşî keno. Eke AKP vano qey pê polîs, tanq û topan nê weçînayîşî de  eşkeno ser bikewo zaf xapîyeno. Ez qesre rê vana ke talîmat dayo nê polîsan; cewabê tewr pîlî do şarê kurdî 31ê adare de bido şima. Şarê Farqînî do cewabê bido şima.

Qeyûm semedê xizmetê şarî nê semedê xespkerdişê îradeyê şarî kurdî ame wezîfekerdene. Qeyûman hende dizdê kerd ke AKP bi xo mecbur mend û tayînan rê dewa akerd. Ma do heme şaredarîyanê xo newera bîgerê û newera înşa bikerê. Ma sîstemê hemserekîyê bifînê dewre û semedê cinîyan dezgeh, kurs û waranê bînan ke hewce kenê biafirnê. No deynê milê ma yo. No îqtîdar kurdan sey hole û xirab keno cîya, dînî îstîsmar keno. Çirew destûrê nê medê.''

Tulaye Hatimogullari dima ra ravîyarte Bismîlî. Şarî bi slogana Bijî berxwedana zindana” heyet pêşwazî kerd. Hatimogullari verê buroyê weçînayîşî de qisey kerd.

Tulaye Hatimogullari ard ziwan ke şarê kurdî rixmê heme poltîkayanê tecrîdî têkoşînê xo domeneno û nê vatî: ''Bi tecrîdî zîndanê açarnayî îşkencexaneyan. Êyê ke sîstemê tecrîdê Îmraliyî heme Tirkîya ra vila kenê wa bizanê ke şarê kurdî do semedê azadîya xo têkoşînî rê dewam bikero. Çew nêeşkeno verê têkoşînê kurdan bigero. Ma do 31ê adare de sere de Amed Kurdîstan ma do hinî bêrê ke, wina ser bikewê ke nameyê qeyûman zî nêro vîrî. Qeyûmanê ke tabelayê kurdî wedaritî, nameyî kurdkî bedilnayî, tehemulê înan kurdkî rê çîn o, ma do înan pêrune gezi bikerê û  reyna şaredarîyeya zafziwanî bifînî dewre. Heme dezgehê cinîyan ke înan qefilnayî ma do yew bi yew înan newera abikerê.''