Wekîla HDPyî yê Adana Tulaye Hatîmogullari erdlerzî ra dima ca de ver bi memleketê xo Hatay şîye. Nêmeyê şewe de resaye herême û Erzîn û Samandag de testîpî kerdî û a bi xo şahîd bîye ke herême de xebatê gêrayîş û xelisnayîşî bi rojan nêresayî xirban ser o.

Hatîmogullari vat: ''Bi taybetî Îskenderûn, Antakya û Samandagî de xeylê cayî rijîyayî û bi hezaran însanî zî binê xirban de yê. Nas û merdimê înan zî bêçare xirban ser o vinderte yê.  Herême de şaro ke ameyo xelisnayene, mucadeleyê înan ê ciwîyayîşî dewam keno çunke hema zî koordînasyonê merkezî nêameyo ronayene. Koordînasyonê sîvîl-însîyatîfê zerrîwazan reyde pîya xebatêka koordînasyonî daye destpêkerdene. Hende wextî ra dima hema zî binê xirban ra veng yeno, bi mudahaleya raste, xebatêka rastêne û bi malzemeyanê rastênan hîna zaf însanî do bêrê xelisnayene.Ma eşkenê bi paştîyayewbînangirewtişî birînanê erdlerzî pîya bipêşê.''

Tulaye Hatîmogullari  vat: ''Hema aşma kanûne de raporê TMMOB yê seba erdlerzî de, çîyê ke gere bi lez û bez bêrê kerdene rêz bi rêze ameybî nuştene û ma zî nê raporî da meclîsî. La meclîs goş nêda ci û bîyî sebebê na felakete.''