Denîze Poyraza ke 17ê hezîrana 2021î de hêrişê vera Rêxistina HDPyî ya Îzmîrî de amebî qetilkerdene, ewro roniştişê çarin ê dewaya ci bibi.  Kesêk pa çeke waşt bikewo heyata roniştişê dewaya Poyraze. Heyetê Rayberdişî yê Merkezê Partîya Demokratîke ya Şaran (HDP) derheqê babete de eşkerayîye daye.

Eşkerayîya HDPyî de nê ameyî vatene: ''Roniştişê çarin ê dewaya embaza ma Denîze Poyraz ewro Îzmîr de yeno kerdene. Roja qirkerdişî ra nata ma vanê ke no hêriş plankerde ame kerdene û plankerdoxê hêrişî yenê nimitene û kiştox yeno pawitene.  Ewro bertengê yewna felaketî ra ame agêrayene. Verê roniştişî nuqtayê cigêrayîşê ke temsîlkarê partîyanê sîyasîyan û dezgehanê komelê sîvîlî cêra cor yenê cigêrayene ra kesêk pa çeke ravêrt û heta verê berê edlîye ame ke yewna hêriş bikero. No zî mojenano ke ma roja verêne ra vatişanê xo de heqdar ê. Vizêr keso bi anmeyê Akin Akozî wekîlanê ma rê mesajê tehdîtî şawit û tehdîtê sey '2Şima verê Edlîyeya Îzmîrî de bêrê pêser, ma zî do wayûbirayanê xo sey bombaya ganî bişawe'' kerdî.  Ma vizêr derheqê nê şexs û tedîtanê ci dezgehê eleqedarî hîşyar kerdî.

Eşkerayîye de Wezîreya Karanê Zereyî û Asayîşê Îzmîrî rê nê persî ameyî persayene:

Eleqeya nê hêrişkarî bi  kesê ke wekîlê ma tehtîd kerdî est a?

Mabênê nê hêrişkar û kiştoxê Denîze Poyraze de tekîlîyêke est a?

No hêrişkar zî sey kiştoxê verênî hetê eynî çeteyan ra ameyo perwerdekerdene?

No kiştox zî hetê hêzanê ke qirkerdişê Denîze Poyraz kerd ra ameyo organîzekerdene?

No kiştox zî endamêkê hucrayanê qirkerdişî yê ke vera partîya ma ameyî amadekerdene yo?

No kiştox rixmê hende tedbîranê giranan senî heta verê banê edlîye ame?

Ma qerardar û zelal vanê ke hêrişê winayênî nêeşkenê verê ma bîgêrê. Ma hêzê xo şarî ra genê. Ma do kiştox û tarîtîya peyê ci ra hesab bipersê. Êyê ke nê plananê kaosî kenê û kayanê tehlukeyinan kay kenê ma înan reyna hîşyar kenê, şima do binê plananê xo yê leyminan de bimanê. Nê hêrişî têna vera partîya ma nîyê. Şexsê ma de sîyaseto demokratîk yeno hedefgirewtene. Ma veng danê şarê xo û hêzanê demokrasîyî, ma eşkenê pîya nê plananê kaosî vindarnê. Bêveng memanê, nêvînayîşî ra merê, teslîmê plananê tarîyan mebê.''