HDP: Qedexeyan merdimê kokimî hedef kerdî

Komîsyonê Polîtîkayanê Weşîye û Komelkî yê HDPyî vat: ''Hîşmendîya qedexekere kokiman hedef kena. Ma her tewirê cîyatîye red kenê.''

Komîsyonê Polîtîkayanê Weşîye û Komelkî yê HDPyî derheqê cîyatîya vera kokiman a vîrusê Korona reyde eşkerayîyêka nuştekîye daye.

Eşkerayîye de ame vatene ke qedexeyê vejîyayîşê teberan ê kokiman ra dima bi taybetî kuçeyan û medyaya komelkîye ser o vera kokiman cîyatîye yena kerdene. Eşekayîye de ame vatene: ''Îqtîdaro bîyo mabênê cezayan û sûcan de têkilîyêka xurte virazeno. Dewleta ke qedexeyan ana ca êyê ke goreyê qedexeyan tênêgêrenî sûcdar mojnenê û komel zî bê persan tesîrê ney de maneno.'' 

Dewamê eşkerayîye de ame vatene ke tehlukeyê Korona reyde têkilîya merdiman bîye kêm û ame waştene ke ganî hemwelatî bêrê zanayîşdayene, bawerîya pê otorîteyanê umûmîyan bêra caardene, hewcedarîyê bingeyî yê merdiman bêrê peydakerdene û metodê weşkerdişî bi lezî bêrê kerdene.''