Hemsereka Pêroyî ya HDPyî Pervîne Buldan keyeyê xo yê Îstanbulî de pê weşanê gandarî rojdem ercna. Buldane îfade kerd ke partîya înan kombîyayîşê xo yê Heyetê Rayberdişî yê Merkezî (MYK) pê weşanê gandarî ard ca û eşkerayîye daye.

Qiseykerdişê Buldane ra beşêk wina yo:

''Tirkîya de hûmara kesanê ke Korona ra merdî zêdîyena û vîrusê Korona vila beno. Nê prosesî de paştdayîşê mabênê welatan zaf girîng o. Ma sey HDPyî veng danê ke keye de bimanê. Ganî Tirkîya de cuye bêra vindartene û hukmat seba naye zî temînatêk bido komelî.

Derheqê qanûnî de vînayîşê muxalefetî nêameyî girewtene. Hukmat ê xo de israr keno. Ganî pê nê qanûnî pêro tepişteyî bêrê veradayene. Bi hezaran merdimî fikr û vînayîşanê xo ra semed zîndanan de yê.

Ma reyna vanê ke cîyatîye nêra kerdene û ganî no qanûn seba pêro tepişteyan derbazdar bibo. Ganî no qanûn wijdanê pêro merdiman rehet bikero. Ma pêşnîyaz kenê ke zîndanan bikerê merkezê karantîna.

Zîndanê Îmrali de têna Birêz Ocalan tepişte nîyo. Tepişteyê bînî zî estê. Birêz Ocalan koma rîskî de yo. Naye ra ma wazenê Îmrali ra vengêk yan zî dîmenêk bireso komelê Tirkîya. Ganî Birêz Ocalanî rê heqê telefonî zî bêro dayene û heyetêko xoser şoro Îmrali.

Ma kampanyaya paştdayîşê keyeyan rêxistin kerd. Na kampanyaya paştdayîşî û yewîye ya. Ma bi sloganê 'Ma pare kenê şima zî pare bikerê' dest pêkenê.''