Rojnamegere-nuştoxe Berrîne Sonmez derheqê konseptê hêrişanê îşxalî û hêrişanê vera kultur û ziwanê kurdan de ANFyî rê qisey kerd.

Berrîne da zanayene ke dewleta tirke wazena ke destkewteyanê kurdan qels bikero. Berrîne pê hesna ke şarê kurdî şarêko xoverdayox û polîtîk o ke eşkeno verê nê hêrişan de vindero.

 Berrîne bale ante hêrişanê dewleta tirke yê vera Başûr û Rojawanî ser û vat: ''Dewlete nêwena ke Îran, Iraq û Sûrîye de zî kurdî bibê wayîrê otonomî. Dewlete kena ke PKK qabîlîyetê xo yê têgêrayîşî nê cayan de destî ra bikero. Goreyê dewlete eke PKK qels bibo kontrolê şarê kurdî do bikewo destê ci.''

Berrîne hêrişê vera kultur û ziwanê kurdan vistî vîrî û vat: ''Vera nê hêrişan komel refleksêkê qelsî mojneno. No zî eşkera keno ke ferasetê nîjadperestîye welat de serdest o. Hetê bînî ra îqtîdar keno ke weçînayîşan ra dima kurdan ceza bikero. La weçînitoxê kurdî nê kerdişanê îqtîdarî do sindoqan de ceza bikerê.''

Berrîne Sonmez vera muxalefetî nêrazîbîyayîşê xo mojna û vat ke ganî muxalefet seke vera destsernayîşê Şaredarîya Wanî têgêrayo vera nê hêrişan zî heman tewir bimojno.