Endama Komîteya Merkezî ya PKKyî Hêlîne Umît ANFyî rê rojdem ûçend babetê bînî ercnayî. Qiseykerdişê Umîte ra beşêk wina yo:

''Îtîfaqê AKP-MHPyî seba ke estbîyayîşê ma çin bikero hêriş keno. Nê îtîfaqê faşîstî seba qirkerdişê kurdan pêro îmkanê xo seferber kerdî. Erdogan û Bahçelîyî îlan kerd ke ê vera PKKyî şer kenê la a raşte ê vera cuya azade, demokratîke û têdûşte şer kenê.

Ganî her kes bizano ke hêrişo tewr pîl warê hîşmendîye de yo. Faşîzmê AKP-MHPyî her çîra ver wazeno paştdayîş û yewîya kurdan çin bikero. Dezgehê medya, xayîn û ajanî zî seba ney îqtîdarî rê ardim kenê.

Seba ke faşîzmê AKP-MHPyî bêro famkerdene ganî ma biewnê rewşa ciwanan. Seba ke verê ciwanan bêro girewtene her roje ciwanî erzîyenê zîndanan. Vera ciwanan metodê taybetî dewre de yê. Îqtîdaro ke pê operasyonan nêeşka HDP tasfîye bikero nika zî dewaya qefilnayîşî viste rojdem.

Hemleya ma Wextê Azadîye Kurdîstan û teberê welatî de prosesêko girîng peyê xo de verda. Gerîlayê ma rayberîya na hemle kenê. Şar û gerîlayî sayê na hemle de zêdêr têbîyî. Ganî nê prosesî de ciwanî xo rêxistin bikerê û têbigêrê. Ganî ciwanê kurdî hewcedarîyanê prosesê şerî lez bimusê û bivurîyê yewinanê wayîrê înîsîyatîf û xoserî. Na babete de astengîye çin a.

Îrade û hîşmendîya şarî do ameyoxî biafernê. Têgêrayîşê ma yê cinîyan zî beno hêzê xoverdayîş û têkoşînê kurda. Têgêrayîşê Cinîyan ê Azadan Hemleya Wextê Azadîye de hêzo ronayox û îdarekar o. Coka nê esasî ser o Vakur de û parçayanê bînan ê Kurdîstanî de çalakîyan de xeta azade vejîyaye vernî.

Seba azadî û vurnayîşê sîstemî ganî zêdêr karî bêrê kerdene. Ganî Vakur de kolonyalîzmo qirker biqedo ma ganî çalakîyanê girseyan bikerê. Tabî tîya de ma vînenê ke tewr zaf zîndanî wayîrê Hemleya Wextê Azadîye vejîyenê.  Ez nê embazanê tepişteyan rê selam û hûrmet kena.''