Hêrişê vera Wekîlê Riha Omer Ocalanî bi hawayêkê hemwextî xeylêk şaristanan de ame protestokerdene. 

Riha

Qezaya Xelîlî ya Riha de Hemserekê DBPyî Salîha Aydenîze û Keskîne Bayindir, Hemvervatoxê Partîya Çep a Keske Îbrahîm Akin û Çîgdeme Kiliçgun Uçar, Hemserekê KCDyî Berdan Ozturk, wekîlê Partîya Çep a Keske û xeylêk kesî tewrê eşkerayîye bîyî. Girse hêverî ver bi bînaya HDPyî şi. Hemvervatoxê Partîya Çep a Keske Îbrahîm Akinî tîya de eşkerayîye wende û vat: ''Ma do qetî teslîmê polîtîkaya şerî nêbê. Ma do pîya aqîbetê welatî bivurnê.'' Hemvervatoxe Çîgdeme Kiliçgun Uçar zî ard ziwan ke kurdî qetî sîyasetê demokratîkî ra fek vera nêdê. 

Wextê rayraşîyayîşî de polîsan çekûya 'Kurdîstanî' ser o girseyî rê gef wend la girse pê slogananê 'Bijî Serok Apo' û 'Kurdistan do faşîzmî rê bibo gorîstan' cewabê gefî da. Girseyî dima verê bîna de çalakîya roniştişî kerde.

Amed

Meydanê Şêx Seîdî yê qezaya Sûrî de eşkerayîyêke dîyaye. Eşkerayîye de pankarta 'Şima nêeşkenê destê xo bidê îradeyê ma' ameye akerdene. Hemserekê HDPyî yê Amedî Zeyad Ceylanî çalakîye de qisey kerd û pare kerd ke ê zemînêkê meşrûyî de sîyaset kenê û hêrişî nêeşkenê verê sîyasetê înan bigêrê.

Hemvervatoxa Partîya Çep a Keske ya Amedî Pinare Sakik Tekîn eşkerayîye wende û da zanayene ke serekê Meclîsî û partîyê meuxalefetî vera hêrişê serê Ocalanî bêveng ê û na bêvengîye nêna qebulkerdene. Tekîne vat: ''Ma venga şarê ma û dostanê ma danê ke vera hêrişanê winayênan hîsger bibê. Ma do hesabê nê hêrişan bipersê.''

Çewlîg

Çewlîg de zî verê banê HDPyî de bi eşkerayîya çapemenîye hêrişê vera Omer Ocalanî ame protestokerdene. Hemserekê HDPyî û Hemvervatoxê Partîya Çep a Keske yê bajarî û xeylêk kesî tewrê eşkrayîye bîyî. Eşkerayîye hetê Hemserekê HDPyî yê Çewlîgî Feyzullah Şeyhogluyî ra ameye wendene.

Wan

DBP, HDP, Mayê Haştîye, TJA û rêxistinê komelê sivîlî tewrê eşkrayîya çapemenîye bîyî. Çalakîye de pankarta 'Destê xo medê îradeyê şarî' ameye akerdene û sloganê 'Omer Ocalan îradeyê ma yo' ame vatene.

Îstanbul

Rêxistina HDPyî ya Îstanbulî verê bînaya xo de eşkerayîyêke daye. Hemvervatoxa Partîya Çep a Keske ya Îstanbulî Besere Çelîk metnê eşkerayîye wend û vat: ''Pê hêrişanê vera temsîlkaranê ma yeno armanckerdene ke şar bêîrade bibo. La ma do sereyê xo nêarê war û hesabê nê hêrişan bipersê.''

Şirnex

Verê bînaya HDPyî de bi beşdarîya TJA û Mayanê Haştîye eşkerayîye ameye wendene. Hemsereka HDPyî ya Şirnexî Sabuha Akdag eşkerayîye wende û dima girseyî bi sloganê 'berxwedan jiyan e' çalakîya roniştişî kerde.

Mêrdîn, Anqara û Îzmîr de zî bi eşkerayîyan hêrişê vera Omer Ocalanî ame protestokerdene.