Endama Heyetê Rayberdişî yê Komeleya Cigêrayîşanê Kultur û Ziwanî ya Mezopotamya (MED-DER) Dîlane Guvenç derheqê asîmîlasyonê vera kurdkî de ANFyî rê qisey kerd.

Dîlane Guvenç pare kerd ke vera kurdkî asîmîlasyonê dewlete dewam keno û vat: ''Mîyanê komelî û keyeyan de qiseykerdişê bi kurdkî kêm bîyo. Dewlete serranê peyênan de polîtîkayê faşîstî giran kerdî. Bi taybetî wextê qeyûman de derheqê kurdkî de vengîyêke virazîyaye. Polîtîkayanê asîmîlasyonî ra eleqeyê seba kurdkî kêmîyeno.''

Guvençe îfade kerd ke safhaya tewr girînge asîmîlasyon de qedexeyê vera kurdkî yo û vat: ''Dewleta tirke ganî waştişê şarî ser o Qanûnê Bingeyîyî de seba kurdkî vurnayîşan bikera. Ronîyayîşê Komara Tirkîya ra nata sîstemê dewlete çinkerdişê kurdkî ferz keno. Dewleta tirke esasê yewziwan, yewnetewe ûsn. ser o ronîyaya. Qetilkerdişê ziwanî heman wextî de qetilkerdişê komelî yo. Dewlete kurdan bê ziwan coka bê nasnameyî verdena. Vera ney ganî ma bi ziwanê xo qisey bikerê û seba ke kurdkî biba ziwanêko fermî têbigêrê.''

Guvençe vist vîrî ke dezgehê kurdkî yenê qefilnayene û vat: ''Bi destê qeyûman pêro dezgehê ma ameyî xespkerdene. Kar û xebatê serê kurdkî yenê krîmînalîzekerdene. Bi tepiştiş, destbendkerdiş û qefilnayîşî embazanê ma rê gefî yenê werdene. Ziwanê ma heqê ma yo û ma wazenê bi hawayêkê azadî bi ziwanê xo qisey bikerê. Seba ney zî dezgehê ma têkoşîn kenê. Ma sîstemê pirrziwanî û pirrkulturelî pawenê. Heta ke ziwan û kulturê kurdan bibê wayîrê statuyêkî û bi qanûnan bêrê pawitene ma do têkoşîn bikerê.'