Heyetê Ewnîyayîşî yê Grevê Vêşanîye şi Hepisxaneyê Kandirayê Tîpê F’yî yê Hûmara 1’î û girewteyan reyde pêvînayîş viraşt.

Heyet de Sereka Beşê Stenbolî ya ÎHD'î Gulser Yolerî, Endamê Heyetê Odeya Doktoranê Stenbolî (ÎTO) Murat Ekmez, Serekê Beşê SES'î yê Anadoluyî Erdal Guzen û Temsîlkarê Weqfa Heqanê Merdiman a Tirkîya (TÎHV) Umît Efeyî ca girewt.

Heyetî pêvînayîşî ra dima eşkerayîye daye. Bi nameyê heyetî Yolerî ard vîrî ke Kandira de nê 100 rojî yê grevê vêşanîyê dewam keno.

Yolerî derheqê rewşa weşîye ya xoverdayoxanê grevê vêşanîye de vat, girewteyan xeylî kîlo vîndî kerdo, nêzdî 15 kîloyî vîndî kerdê, wexto ke çîyêko awin şimena, bi zehmet şimenê; persanê sey, emel, viritiş seredej, krampan û vera vengê hesasbîyayîşî ciwîyenê.

Yolerî hetê bînî ra vat, destpêkerdişê grevê vêşanîye ra nata cipersayîşê dîsîplînî girewteyêk rê ameyo akerdene û nêtîceyê cezayanê dîsîplînî 3 mengî ceza ci rê ameya birnayene.

Yolerî vat, “ Girewteyî vanê ganî waştişê ma bêrê caardene. Û heta ke waştişê înan nêrê qebûlkerdene ê do çalakîya xo dewam bikerê. Ma do nê prosesî nêzdî ra teqîp bikerê. Hîna ke perse zaf giran nêbîya, hîna ke zêde kes nêmerdo û astengdarîyê mendayî nêvirazîyê, seba ke perse çareser biba çi destê ma ra do bêro ma bikerê.”

Endamê Heyetî Murat Ekmezî zî vat, “Ma vengdayîş kenê, ganî  berê hepisxaneyan heyetanê weşîye yê xoseran rê bêrê akerdene. Naye ra hîna muhîm, seba ke hîna grevê vêşanîye bi merdişan nêqedîyayo, ma kesanê ke meqamanê çareserîye de, merdimê ke wayîrê wijdanî yê rê wazenê ke seba çareserîye bikewê mîyanê têgêrayîşî.”