Heyetê Çimdarîye yo Mîyanneteweyî yo ke 403 çimdaran ra yeno pê, temamîya Tirkîya de do weçînayîşan teqîb bikero. Heyeto ke 175 kesan ra yeno pê, do şaristananê Kurdîstanî de çimdarîye bikero.

Temsîlkarê HDPyî yê Ewropa Dervîş Çîmenî derheqê heyetanê çimdaran ê xoseran de vat: ''Atmosferê verê weçînayîşan ra nêpawîyeno ke Tirkîya de weçînayîşê demokratîk û azadî biqewimîyê. Erdoganî bi kontrolê medya, mehkeme û dezgehanê dewlete kampanyaya weçînayîşî kerde. Her kes vîneno ke rejîmê Erdoganî beno rejîmê dîktatorîye. Coka heyetê xoserî erşawîyayî.''

Çîmenî da zanayene ke Fransa, Îtalya, Spanya, Îngilîstan, Almanya, Hollanda, Swîsre, Avusturya, Norwêç, Danîmarka, Swêd û Fînlandîya ra 175 çimdarê xoserî Amed, Çewlîg, Mûş, Riha, Mêrdîn, Sêrt, Şirnex, Colemêrg, Agirî, Qers, Erdexan, Sêrt, Meletî û Îstanbul de çimdarîye bikerê.

Çîmenî pare kerd ke Temsîlkarîya HDPyî ya Ewropa heyetanê çimdarîye de mîyanê têkilîye de ya.