Înîsîyatîfê Ocalanî rê Azadîye yê Rojawanî bajarê Strasourgî yê Fransa de derheqê tecrîdê serê Rayberê Şarê Kurdî Abdullah Ocalanî de Komîteya Vergirewtişê Îşkenceyî (CPT) reyde pêvînayîş kerd.

Vervatoxê Înîsîyatîfê Ocalanî rê Azadîye yê Rojawanî Îdrîs Saîf, Hemsereka Înîsîyatîfê Avûkatan ê Ocalanî rê Azadîye yê Sûrîye Xanime Ayo û Temsîlkarê Konseya HDPyî ya Ewropa Faîk Yagizay 2 mîlyon û 646  hezar û 211 îmzayê ke Rojawan û bajaranê sey Heleb û Şamî de semedê azadîya fîzîkîye ya Rayberê Şarê Kurdî Abdullah Ocalanî ameyî arêdayene, teslîmê CPT kerdî.

Heyetî badê pêvînayîşî kombîyayîşê çapemenîye kerd.

Îdrîs Saîdî vat: ''Ma mabênê 12ê çeleyî û 13ê adare de kampanyayêke rayra berde. Ereb, armenî, suryanî-asur, tirkme û pêro pabesteyê ma tewrê kampanya bîyî û ma 2 mîlyon û 646  hezar û 211 îmzayî arê dayî. Ma nê îmzayî pêvînayîş de teslîmê selahîyetdaranê CPTyî kerdî. Ma CPTyî ra waşt ke wa hem ey hem zî keye û avûkatî cadê pêvînayîş bikerê. Înan vat ê do rewşa Rayber Apoyî teqîp bikerê.''

Xanime Ayo zî vist vîrî ke a bi nameyê Yewîya Avûkatan ê Sûrîye tewrê pêvînîyî bîya û vat: ''Ma pêvînayîş de waşt wa tecrîd bêro wedaritene û azadîya fîzîkîye ya  Rayberê Şarê Kurdî Abdullah Ocalan bêro caardene. Ma îmzayê xo teslîm kerdî. Înan derheqê zîyaretê xo yê peyênî yê îmraliyî de qisey kerd û vat rixmo ke rapor hazir kerdo, eşkera nêkenê, çunke gerek dewletî îzîn bidê.''