Heyva Sor a Kurdîstanî bi eşkerayîyêka nuştekîye veng da ke verî ke erey nêmano ganî pêro hacetê vergirewtişê vîrusî seba sed hezaran kesan ê hewcedaran ê Rojawanî bêrê erşawitene.

Eşkerayîya Heyva Sor a Kurdîstanî wina ya:

''Seke yeno zanayene vîrusê Korona (Covid-19) bi lez dinya de vila beno. Nê cayan ra ke vîrus tede les vila bi welatê cîranî Sûrîye, Lubnan, Urdun, Iraq û Tirkîya yê. Naye ra zî tehluke esto ke vîrus derbazê Sûrîye zî bibo. Bêguman no do tesîrê Rojawanî zî bikero.Rewşa nikayêne de Rojawan û herêmanê Vakur û Rojhelatê Sûrîye de bi se hezaran kesî netîceya îşxalê dewleta tirke de waranê xo ra bîyî, kampan de manenê. Koçberî nêeşkenî xo vîrusî ra bipawê. Coka nê merdiman ser o tehlukeyêko pîl esto. Sey xeylêk cayanê dinya Rojawan de zî seba xopawitişê vera Korona merdimî keyeyê xo ra nêvejîyenê, xebatê dezgehan ameyî batalkerdene û berê dibistanî û zanîngehan ameyî girewtene. Rîxmê tebdîran zî tehlukeyê vilabîyayîşê vîrusî herême de zêde yo.

Bi taybetî şer û hêrişan ra ke 9 serran ra nata dewam kenê, îmkanê cuye û peydakerdişê hacetanê dermankerdişî û xopawitişî kêm ê. Rewşa nikayêne de hewcedarîya Rojawanî pê cîhazanê tesbîrkerdişê vîrusî, hacetanê pakîye û cîhazanê nefesî zaf esta.Nê esasî ser o Îdareyê Rojawanî û Komîsyonê Weşîye venga Neteweyanê Yewbîyayeyan û Rêxistina Weşîye ya Dinya da ke wezîfeyanê xo bîyarê ca. Ma sey Heyva Sor a Kurdîstanî venga terefanê berpirsîyaran danê ke vera vilabîyayîşê vîrusê Korona paştî bidê Rojawanî û herêmanê Vakur û Rojhelatê Sûrîye.Verî ke erey nêmano ganî pêro hacetê vergirewtişê vîrusî se hezaran kesanê hewcedaran rê bêrê erşawitene.''