Pandemîya vîrusê Korona pêro dinya û Kurdîstanî rê hem hetê weşîye ra hem zî hetê ekonomîkî ra tesîrêkê pîlî kena.

Vizêr TJKE-E û KCDK-E dest pê kampanyaya 'Keyeyê Wayeûbirayî' dabi destpêkerdene. Derheqê kampanya de ewro Heyva Sor a Kurdîstanî zî eşkerayîyêka nuştekîye daye.

Eşkerayîya Heyva Sor a Kurdîstanî wina ya:

''Kurdîstan de rîyê vîrusê Korona ra tay keyeyê hewceyê hetkarîya ma bîyî, ma nê keyeyan reyde bibê keyeyê wayeûbirayî. Rîyê vîrusê Korona ra pêro dinya xo ver dana. Kurdîstan de zî hûmara merdimanê ke hewceyê hetkarîye yê zêdîyaye. Qedexeyê vejîyayîşê teberî, girewtişê kargehan rewşa şarê ma giranêr kerde û ganî ma cade destê hetkarîye bidê yewbînan. Vera na rewşe ma seba paştdayîşê şarê xo û derbazkerdişê nê rojan ê zoran kampanyaya 'Keyeyê Wayûbirayî daye destpêkerdene.''

Şertê kampanya wina yê:

-3 mengan her menge ganî tewr tay 100 Euro hetkarîye seba keyeyê wayûbirayî rê bêra erşawitene.

-Zanayîşê keyeyo ke ci rê hetkarîye bêra kerdene hetê Heyva Sore ra bêrê dayene.

-Keyeyo ke do hetkarîye bikero eşkeno bi xo na hetkarîye biresno yan zî eşkeno bi rayîrê Heyva Sore zî hetkarîye biresno.

Heyva Sor a Kurdîstanî venga her kesî da ke seba wezîfeyê merdimîye têbigêro û nê rojanê giranan de hetkarîya bido keyeyanê hewcedaran.

Heyva Sor tewr peyêne de vat: ''Goreyê bira ADDyî eyaletê Rheinland-Pfalzî de destûrê komeleya ma çin o hetkarîye bikera.''