Radyo Onda d'Urto 1992 ra nata bi hawayêkê tradîsyonelî şaristanê Brescia yê Îtalya de bi beşdarîya hunermendan festîvalêka 18 rojan serûber kena. Festîvala emserîne de ca dîyeno Rayberê Şarê Kurdî Abdullah Ocalanî.

Edîtoranê Radyo Onda d'Urtoyî ra Michele Borrayî ajansê ma rê qisey kerd û pare kerd ke ê paştî danê komelanê têkoşeran.

Borrayî da zanayene ke ê têkoşînê kurdan rewî ra şinasnenê û vat: ''Ma paştî danê têkoşînê kurdan. Vengdayîşê Buroyê Enformasyonî yê Kurdîstanî yê Îtalya ser o ma bire daye ke tewrê Hemleya 'Abdullah Ocalanî rê Azadîye, Meseleya Kurdan rê Çareserîye Sîyasîye' bibê. 2 serrî yo ma bi weşananê xo kenê ke na hemle vila bikerê. Hetê bînî ra ma Rojawan û Başûrê Kurdîstanî de zî têkilîyan nanê ro. Sey radyoyî ma heyetêk şawit Rojawanî. Ewro ra pey zî ma do paştî bidê şarê kurdî û têkoşînê seba azadîya Ocalanî.''

Borrayî îfade kerd ke sey radyo ê girîngîye danê fikranê Rayberê Şarê Kurdî û vat: ''Paradîgmaya Ocalanî Îtalya de şinasîyena. Fikrê Abdullah Ocalanî Îtalya de veng vejenê. Ma zî bi weşananê xo û çalakîyanê xo fikranê Ocalanî vila kenê. Paradîgmaya Ocalanî û Têgêrayîşê Azadîye yê Kurdîstanî seba çepa Îtalya û Ewropa bena çimeyê têkoşînî. Fikrê Abdullah Ocalanî têkoşeran rê bîyê çimeyê faydegirewtişî, rayîr mojnenê ma.''

Borrayî bale ante ser ke tecrîdê Îmraliyî nêno qebulkerdene û vat: ''Ma festîvale de zî wina vat. Ma xîret kenê ke şert û mercê ke Ocalan tede tepişîyeno bidê zanayene û tecrîdî bişiknê. Bi nê hawayî ma xîret kenê ke hukmatê Îtalya tedaya Tirkîya bikera. Şiknayîşê tecrîdî seba caardişê azadîya Ocalanî zaf girîng o.''