Mayanê Şemeyî hîkayeyê merdimanê ê vînîbîyayeyan arê dayî û sîstemêk awan kerd ke pê qodê QRî şar eşkeno nê hîkayeyan bimuso.

Mayanê Şemeyî kuçeyanê Îstanbulî de serê dêsan ra broşurê bi nuşteyê 'Se bîyo?' pê qodê QRî daliqnayî. Şarê Îstanbulî eşkeno nê  qodanê QRî pê telefonê xo bido wendene û xo biresnê hîkayeyanê kesanê vînîbîyayeyan. 

Mayanê Şemeyî derheqê babete de hesabanê xo medyaya dîjîtale de dîmenêk weşana û vat: ''Ma do tim aqîbetê merdimanê xo yê vînîbîyayeyan bipersê û edaletî biwazê. Sere de Meydanê Galatasarayî de şima eşkenê kuçeyanê Îstanbulî de pê nê qodanê QRî xo biresnê hîkayeyanê vînîbîyayeyanê ma.'' 

Qodanê QRî de nika qala hîkayeyanê 27 kesan yena kerdene. Wina pawîyeno ke do hîkayeyê hîna zaf kesan bêrê parekerdene.