Rojnamegero ermenî Hrant Dink 19ê çeleyê 2007î de bi destê dewleta tirke hetê Ogun Samastî ra ame qetilkerdene. Hrant Dînk serrgêra 17. ya qetilkerdişê ci de cayê qetilkerdişî, verê banê rojnameyî de ame vîrardene. Cayo ke Hrant Dink tede ame qetilkerdene de nar, karanfîl û rojnameyê Agosî ameyî ronayene. Pîya bi keyeyê Dinkî xeylêk parlamen ter, sîyasetmedarî, temsîlkarê rêxistinanê komelê sîvîlî, rojnameger û nuştoxî tewrê vîrardişî bîyî.

Warê vîrardişî hetê polîsan ra gerîya binê ablûqa. Metnê eşkerayîye hetê rojnamegere-nuştoxe Oya Baydar ra ame wendene. Baydare vat, ''17 serrî verî tîya de, verê nê berî de bi vatişê Rakele Dinka sînayîye yo ke vîra nêşeno, 'tarîtîya ke yew qergûşî ra yew kiştox afirna, wîjdanê Tirkîya qetil kerd.' Hrant hem derdê nê welatî kiriştêne hem zî derman û wîjdanê şaranê bindestan bi.''

Oya Baydar vist vîrî ke rixmo ke Hrant Dink sey hedefî ame ramojnayene çirey ziwanê haştîye canêverda û vat, ''Ti wîjdanê ma yê Ahparig. Her kes û her çî eşkeno bêro mirndayene la wîjdan nêeşkeno bêro mirnayene. Coka ti her 19ê çeleyî de semedê ma newera yenî dinya. 19ê çeleyî roja wîjdan û wayûbiratîya nê welatî ya. Ganî wina bêro pîrozkerdene. Êyê ke sey to wayîrê erjanê xo vejîyenê, ma înan selam kenê. Êyê ke semedê pawitişê erjanê xo zîndanan de bedel danê, ma înan selam kenê. Ma şexsê Selahattin Demirtaş, Osman Kavala û Gultene Kişanak de heme xoverdayoxanê zîndanan bi nameyê to selam kenê. Ma tîya de Ahparig.''