DEM Partî vizêr 10 şaristanan de seba dîyarkerdişê namzetanê şaredarîyan û endamanê meclîsan verweçînayîşî kerdî. Hûmaritişê rayan qedîya. Weçînayîşanê herêmîyan ê 31ê adare de 90 merkezan de seba dîyarkerdişê namzetanê hemşaredaran, namzetanê meclîsanê şaristanan û endamanê meclîsê şaredarîyan sindoqî ronîyayî.

Çewlîg: Merkezê Çewlîgî de Merkezê Ciwanan ê Çewlîgî de sindoqî ameyî ronayene û 388 delegeyan rayî şuxulnayî. Aydin Burçin 151, Cuma Karaslan 179, Orhan Kemal Elbuga 58 rayî girewtî. Ewro Çewlîg de do mabenê Burçin û Karaslanî de delegeyî reyna rayan bişuxulnê. Qezaya Kanîreş de zî 250 delegeyan rayî şuxulnayî.Verweçînayîş de Mehmet Gençî 180  Kuçuk Atliyî 59 rey girewtî. Genç sey namzedê şaredarî yê DEM Partî ame vîjnayene. Şaristan û qeza de  namzeda şaredarî ya cinî do hetê komîsyonê merkezî ra bêro dîyarkerdene.

Dep: Depê Xarpêtî de Orhan Alik 114, Cafer Ugur 84, Savaş Erdogan 80, Mehmet Kayisi Biliciyî 8 rayî girewtî. Ewro do semedê  Orhan Ayik û Cafer Ugurî delegeyî newera reyan bişuxulnê. Dep de têna cinîyêke semedê hemşaredarîye muracat kerd, komîsyonê pêroyî yê merkezî do nê muracatî biercno.

Elîh: Elîh de de zî verweçînayîşî turê diyînî rê mendî. Ewro do semedê Gulîstane Sonuk û Gubete Dogan û Mehdî Ozustun û Ferhat Ataca newera rayî bêrê dayene.

Mêrdîn: Mêrdîn de Ahmet Turkî se ra 50î ra zafêr rayî girewtî û tûrê diyînî rê nêmend. Namzedê cinîyî Gulîzare Îpek Bîlek û Devrîme Demîr tûrê diyînî rê mendî. Qezayan Artuklu, Dêrik, Şemrax, Qoser, Nisêbîn û Kerboran de zî do tûrê diyînî bêro kerdene.

Şirnex: Seba 445 delegeyan 3 sindoqî bînaya DEM Partî ya Şirnexî de ronîyayî. Raydayîşî ra ver Wekîla DEM Partî ya Dêrsimî Aytene Kordu qisey kerd û vat: ''Ma zanenê ke şarê ma bi partîya xo bawer o. Ma bi na bawerîye verweçînayîşan kenê û kenê ke bibê layîqê bawerîya şarê xo.'' Weçînayîşanê seba şaredarîya Şirnexî de Turane Saltan 331, Sabrî Soysal 76 û Osman Çavlakî jî 38 rayî girewtî. Seba Meclîsê Şaristanî netîceyî dima do bêrê eşkerakerdene.

Mersîn: DEM Partî seba dîyarkerdişê namzetanê hemşaredaranê Akdenîzî rayî dîyayî. Verweçînayîş de Mehmet Altuntaş 307, Hoşyar Sariyildiz 271, Mehmet Şîrîn Kaya 103 û Mehmet Alîşî zî 34 rayî girewtî. Namzetan ê cinîyan ra Nuriye Arsalan 260, Zerîfe Genç 157, Fatma Demîr 126 û Hulusî Ayhan Keskîn 121 rayî girewtî. Verweçînayîşî turê diyînî rê mendî û turê diyînî de seba Mehmet Altuntaş û Hoşyar Sariyildiz û Nuriye Arslan û Zerîfe Genç rayî do bidîyê. Turo diyîn ewro saete 10.00 de Salona Veyveyî ya Şahî de do bêro kerdene.

Riha: Riha de seba 645 delegeyan 6 sindoqî ronîyayî. Riha de zî verweçînayîşî turê diyînî rê mendî. Turo diyîn do mabênê Hidir Oktay û Fadil Mendanlîogluyî û Rukene Baran û Dîlane Dogan de ewro bêro kerdene.

Wan: Wan de 3yê ci cinîyî 12 namzetî kewtî verweçînayîşî. Qezayanê Qelqelî, Serav, Bêgirî, Ebex û Payîzava de verweçînayîşî ameyî betalkerdene. Qezayanê Şax, Erdîş û Westanî de verweçînayîşî turê diyînî rê mendî.

Erzirom: Xinis, Qereyazî, Qereçoban û Tatos de verweçînayîşî turê diyînî rê mendî.

Colemêrg: Merkezê şaristanî de Sînem Seven 248, Viyan Tekçe 315, Mehmet Sıddık Nakit 240, Şukru Çallı 272 rayî girewtî û verweçînayîşî turê diyînî rê mendî. Qezaya Şemzînanî de verweçînayîşan de şarî bire daye ke Nazare Opengin û Naîf Eroguz do binê namzetê hemşaredaran.

Mûş: Merkezê Mûşî de Mehmet Suat Ertugrul 122 û Sirri Soylemez 204 rayî girewtî û verweçînayîşî turê diyînî rê mendî. Kop de verweçînayîşî turê diyînî rê mendî. Qezaya Gimgimî de şarî bi rayanê xo bire daye ke Gulbahare Kaya û Giyasettîn Aydemîr bibê namzetê hemşaredaran.

Îdir: Merkezê Îdirî de verweçînayîşî turê diyînî rê mendî. 

Agirî: Agirî de û qezayanê ci Bazîd, Gîyadîn û Patnosî de zî verweçînayîşî turê diyînî rê mendî.

Sêrt: Sêrt û qezaya ci Misircî de zî verweçînayîşî turê diyînî rê mendî.