Hêzanê Kede Haştîye û Demokrasîyî yê Îstanbulî bi wesîleya 1ê Êlule Roja Haştîye ya Dinya Meydanê Îskele yê Kadikoyî de bi şîarê  ''Semedê haştîya komelkîye cuyeya seycîye û azade'' mîtîng kerd.

Endamê Dayîkanê Haştîye, hêzê kede,  karker, sîyasetmedar, temsîlkarê rêxistinanê cinîyan, huqûqnasî, pawitoxê hewan,cin, ciwan û xeylêk kesî tewrê çalakîye bîyî. Bi pankartan û sloganan bale ameye antene waştişê haştîye ser.

Wekîlanê Partîya Çep  a Keske waşt bi dovîzanê ''Semedê haştîye tecrîdî rê nê'' bikewê warê çalakîye. Polîsan verê wekîlan girewt û waşt dovîzan bîgêrê la wekîlan bizorî pa dovîzan kewtî warî. Dayîkanê Haştîye zî kurdeleyê morî dayî sereyê xo ro, laçikê sipîyî ke sembolê haştîye yê, bi oyeyê çeqer, sûr û hewzî antî xo û bi dovîzanê  ''Haştîye do bi destê şaran bêro'', ''Semedê haştîye tecrîdî rê nê'' kewtî warê çalakîye.

Çalakîye de verî semedê şehîdanê têkoşînê azadîye rêz ame girewtene. Qiseykerdişê akerdişî de xoverdayîşê cinîyan ê Îranî ame selamkerdene û Dayîkê Haştîye Adalete Sefali û Perîşane Akçelîk û lajê ci Cîhan Akçelîk yê ke gama ke îfadedayîşê dozgerîye ra agêrayêne qeza kerd û dinyaya xo bedilnaye, ameyî yadkerdene.

Dayîkanê Haştîye ra Bedîa Gokgoz ke tîya qisey kerd, qirkerdişê ke netîceya polîtîkayanê îqtîdarî de Kurdîstan de yenê kerdene şermezar kerdî û vat: ''Ma Dayîkê Haştîye heta ke weş bê ma do têkoşînê haştîye bidê domnayene.'' Gokguze veng da îqtîdarî ke wa polîtîkayanê xo yê şerî û îşkenceyê vera cenazayan caverdo.

Dima ra metnê çapemenîye ame wendene. Eşkerayîye de bale ameye antene polîtîkaya hêrişkare ya îqtîdarî ser û wina ame vatene: '' Îqtîdar wazeno pê pêkewtiş û dişmenîye payra bimano. Coka zere û teberê sînorî de operasyonan keno û welatî fîneno mîyanê tengayîye.  Rîyê polîtîkayanê rant û şerî yê îqtîdarî ra ewro şar feqîr û vêşan o.''