Endamê Komîteya Merkezî ya PKKyî Duran Kalkanî bernameyê taybetî yê Medya Haberî de bi wesîleya serrgêra 24. ya Komployê 15ê Sibate qisey kerd.

Qiseykerdişê Kalkanî ra tay qismê girîngî wina yê:

''Sîstemê tecrîd û îşkenceyî yê Îmraliyî pê cezayanê neweyan dewam keno. Mengêke ra dima rewşa Îmraliyî kewena serra 25. Ganî cezaya muebeda girankerde ya vera Rayber Apoyî newe ra bêra ercnayene. Dewleta tirke nika bi cezayanê dîsîplînî kena ke verê caardişê heqê hêvîye bigêra. Dewleta tirke ne goş dana qanûnanê xo ne zî goş dana qanûnanê Ewropa. Sîstemê Îmraliyî sîyasî yo. Çalakîyê vera tecrîdî dewam kenê. Nobeta Edaletî ya wekîlan nê warî de zaf girîng a. Ganî tecrîdî dinya de bikerê rojdem. 

Vera tecrîdî hemwelatîyanê ma Veysî Taş û Mehmet Akarî bedenê xo da adirî ver. Nînan pê çalakîya xo veng da ke wa her kes vera tecrîdî têbigêro. Nînan dî ke bi tecrîdê Îmraliyî hêrişê vera kurdan zî yenê girankerdene. Dîyar o ke şexsê sîstemê Îmraliyî de kurdan rê qirkerdiş yeno ferzkerdene. Kerdişê Îmraliyî nê yê. Îmrali dewamê Komployê Mîyanneteweyî yo. Komployo Mîyanneteweyî zî Qirkerdişê Parisî yo, Wan de tecawuzê vera domane yo, îşxalê Efrînî yo, hêrişê kîmyewî yê. Ma xora çalakîya xovêşnayîşî tesdîq nêkenê. Seba azadîya Rayber Apoyî ganî çalakîyê afernayoxî û stratejîkî bêrê kerdene. Nê prosesî de tewirê CPTyî nêno qebulkerdene. Ganî CPT goreyê krîteranê xo têbigêro û raştîyanê serê Îmraliyî eşkera bikero. 

Ma hê kewenê serra 25. ya komployî. Sîstemê Îmraliyî sîstemê qirkerdişî yo. Ganî ma hînî armanc û hedefanê Komployê Mîyanneteweyî û tecrîdê Îmraliyî hol fam bikerê.  Hêzanê hegemonîkan ê sey Amerîka Komployo Mîyanneteweyî kerd. Çunke nê hêzî fikranê Rayber Apoyî ra û azadîya şarê kurdî ra tersayêne. Ewro zî bi sîstemê Îmraliyî Komployo Mîyanneteweyî dewam keno. Têkoşînê vera tecrîdî zî têkoşînê vera Komployê Mîyanneteweyî yo. Nika dewleta tirke wazena pê tecrîdê îmraliyî Rayber Apoyî bêtesîr bikera. Bala xo bidê ser; serra 25. ya komployî de hêrişê vera têgêrayîşî û kurdan zî zêdîyayê. Coka têkoşînê serra 25. zaf girîng o. Ganî ma serra 25. ya komployî bikerê serra serfîrazîye. 

Xora Garê, Heftenîn û Xakurkê û dima zî Avaşîn û Metîna de, bi taybetî Zap de ma asta xoverdayîşê xo eşkera kerde. Zap, Avaşîn û Metîna de gerîlayan hewes û hêvîya îşxalkeran û komplogeran şiknaye. Serfermandarîya Tirkîya vana ke ê resayê armancê xo. No zûr a. Armancê înan îşxal bi û nêeşkayê nê herêman îşxal bikerê. Artêşa îşxalkere herêmanê ma ra remaye. Têkoşîno ke netîya Komployê Mîyanneteweyî ya, serra 25. de do hêrişanê îşxalî û tecrîdî çin bikero. Gerîlayî hê serkêşîya serkewtişî kenê. Şaranê Tirkîya zî nê prosesê şerî de rîyê AKP-MHPyî yo faşîst dî. 

Nika AKP-MPyo faşîst veno 14ê gulane de weçînayîşî do bêrê kerdene. La hetêkî ra zî şer dewam keno. Nê weçînayîşî zaf girîng ê. Tirkîya mîyanê vurîyayîşêkê pîlî de ya. Tirkîya rê şorişêko sîyasî, komelkî lazim o. A raşte îqtîdarê AKP-MHPyî mîyanê tengîye de yo. Ma hêvî kenê ke nê prosesê weçînayîşî de Tirkîya ver bi şerêkê zereyî, pêkewtiş û felaketan nêşora. Îtîfaqê Kede û Azadîye û hêzê sîyasî yê demokratîkî bitesîr ê. Ganî nê prosesî de Îtîfaqê Kede û Demokrasî rolê xo bi xurtêrî bîyaro ca. Îqtîdar narey zî keno ke pê blokekerdişê hetkarîya xezîna verê HDPyî bigêro. HDP hêzê xo şarî ra gêno, pereyê xezîna ra ney. Xora no pere zî pê bacanê şarî ameyo pêser. Pereyê dewlete nîyo. 

Serra 2023yî do biba serra şorişê demokratîkî. Armancê ma no yo. Ma do qetî paştî bidê ê kesanê ke seba demokrasî têkoşîn kenê. Ma ver bi serra serkewtişî ya şorişî şinê. Nika ra ez serkewtişê ma fîraz kena û her kesî rê serkewtiş wazena.''