Partîya Çep a Keske netîceyanê weçînayîşanê gulane ra dima kewtbî prosesê ercnayîşî ke xerîtaya xo ya newîye dîyar bikera. Wekîlê Partîya Çep a Keske yê Amedî Mehmet Kamaçî derheqê stratejî û taktîkanê weçînayîşanê herêmîyan de ANFyî rê qisey kerd.

Kamaçî dîyar kerd ke weçînayîşanê 14ê gulane de ê nêresayê armancê xo û vat: ''Netîceyanê weçînayîşî hetê ma ra hem seba nika hem zî seba dewrê verê ma mesajê cidîyî dayî. Ma nê mesajî bi cidîyetî girewtî û prosesê nîqaş, muzakere û ercnayîşan da destpêkerdene. Ma zanenê ke ma prosesêkê zehmetî de yê.''

Kamaçî îfade kerd ke ganî waştiş û bawerîya bi têkoşînî qels nêbê û vat: ''14ê gulane de bi kêmasîyan peyê ma de mend. Ma do nê kêmasîyanê xo ra dersan bigêrê û seba weçînayîşanê herêmîyan bixebitê. Weçînayîşê herêmîyî netîceyanê weçînayîşanê gulane ra dima do hîna zehmet bibê. Ma xo goreyê ney amade kenê. Binê Îtîfaqê Demokrasî û Azadîye yê Kurdîstanî de ma weçînayîşanê herêmîyan de ca girewt.''

Kamaçî da zanayene ke ganî nêzdîbîyayîşê komelî esas bibê û vat: ''Ma do hemle û armancanê reqîbanê xo hesab bikerê la ganî ma teyna pozîsyonê pawitişî de nêmanê. Faturaya weçînayîşanê gulane ma rê girane ameye. Coka ganî ma teyna bala xo nêdê binvistişî ser. Ganî ma bala xo bidê serkewtişî ser zî. Naye ra ber ma eleqedar nêkeno ke kamî bin kewtê yan zî ser kewtê.''