11ê adare ra nata Wezîrê Weşîye yê Tirkî pare kerd ke vîrusê Korona vila beno û hem hûmara qurbanan hem zî hûmara nêweşan zêdîyena.

Sey tedbîr zî Kurdîstan û Tirkîya de karantîna ame ferzkerdene. Derheqê netîceyanê nê prosesê karantîna de pisporê Xizmetê Komelkî Mustafa Altintopî qisey kerd.

Altintopî da zanayene ke rewşa nikayêne ya janî giran a û seba ke merdimî xo tira bipawê ganî pêşnîyazanê pisporan bîyarê ca. Altintopî bale ante ser ke karantîna zî nê tedbîranê pawitişî ra yew a ke hetê psîkolojîk-komelkî ra tesîrê merdiman do bikera.

Altintopî vist vîrî ke merdimê nika keye de manenê heman wextî de qerqilîyenê û vat: ''Ma hem xîret kenê ke janî ra xo bipawê hem zî hetê komelkî ra kewtî rewşêka bidezavantaje. Ma seba ekonomî zî qerqilîyenê. Tedbîrê 'keye de bimane' bi hawayêkê negatîfî beno ke tesîrê merdiman bikero. Xora ma ameyox de netîceya naye holêr vînenê. Merdimî wextê karantîna de qesawetî ra beno ke hêrişkar bibê. Eke hetê psîko-komelkî şima qels bibê jan bi hawayêkê giranêrî do tesîrê şima bikero.''