Zîndanê Sîncanî de tepişte Huseyîn Karaoglan 11ê êlule ra nata grevê vêşanîye de yo. Waka ey Fatma Karaoglan birayê xo zîyaret kerd û ANFyî rê qala rewşa birayê xo kerde.

Huseyîn Karaoglan seba ke vera bazirgananê narkotîkî têkoşîn kerdêne bi bahaneya 'endamîya rêxistine' tepişîyabi. O Qirkerdişê Zîndanan ê 19ê Kanûne de Zîndanê Umranîye de zî birîndar bibi. Karaoglano ke 20 serrî yo tepişte yo, 2023 de surgunê Zîndanê Bi Asayîşê Berzî yê Sîncanî amebi kerdene.

Fatma Karaoglan pare kerd ke şertê Zîndanê Sîncanî zaf xirab ê û vat: ''Birayê mi hucreyê yewkesî de tepişîyeno. Hucre de warê hewagirewtişî zî çin o û hucre zaf teng o. Seke birayê mi ameyo dekerdene zereyê gorî. Birayê mi seba ke sewqê zîndanêkê bînî bêro kerdene 11ê êlule ra nata grevê vêşanîye keno. Roja 80. ya grevî de gardîyanan hêrişê ci kerd. 

Mi tewr peyên roja îneyî birayê xo zîyaret kerd. Ey vîst kîloyî dayê. Zereyê fekê ci de birînî est bîyî. Dejanê esteyan ra nêeşkeno rabikewo, lingê ci vera masenê. Fek û îdrarê ci ra gonîye yena. Ma hertim muracatê CÎMERî û Wezîrîya Edaletî kenê la cewab nêdîyeno ma. Pêvînayîşê ma yê îneyî de vat ke o do awe û şekerî zî bibirno. Weşîya birayê mi rewşa krîtîke de ya. Wa waştişê birayê mi bêrê caardene. Wa birayê mi terkê mergî nêro kerdene.''