Endamê Konseya Rayberdişî ya KCKyî Mustafa Karasuyî Medya Haber TVyî rê rojdem ercna.

Qiseykerdişê Karasuyî ra tay noqtayê girîngî wina yê:

''Dengizê Marmara de bi merkezê xeta Gemlîkî erd lerza. Nê erdlerzî ra dima qesawetê serê Rayber Apoyî zêdîyayî. 3 serrî yo Rayber Apo de pêvînayîş nêno kerdene. Îmrali de dewleta tirke vera Rayber Apoyî şerê psîkolojîkî kena. Rewşanê sey erdlerzî de ganî tepişteyî bieşkê keye û avûkatanê xo bivînê. Dewleta tirke bi xo zî îtîraf kena ke pê destekê dewletanê Ewropa nê tecrîdî ana ca. Biewnê dezgehê Konseya Ewropa CPT verê tecrîdê Îmraliyî de erkê xo nêano ca.

Çalakîyê wendişê kitaban ê ke bi wesîleya Roja Kitabanê Ocalanî ya 10ê Kanûne yenê kerdene zaf girîng ê. Bi nê çalakîyan fikrê Rayber Apoyî vilayê pêro dinya benê. 

Şerê Herêmanê Pawitişî yê Medya 21ê teşrîna verêne ra nata dewam kena. Dewleta tirke nê şerî rixmê teknîk û îmkananê xo û rixmê destekê PDKyî zî nêeşkena ser bikewa. Heyf ke paştdayîşê PDKyî ra gerîlayî bi nêeşkenê goreyê waştişan têbigêrê. PDK verê lojîstîk û teqwîye de beno asteng. Yanî gerîlayan teng keno. Dewleta tirke her roje bombardumananê giranan kena, daran vêşnena.  Gerîlayî vera nê hêrişan bi ruhê fedayîyî şer kenê. Ma eşkenê vajê ke têgêrayîşê ma 50 serrî yo têkoşînêkê fedayîyî keno. 

Şerê mabênê Îsraîl û Hamasî bi giranî dewam keno. Bi nê şerî zî eşkera bi ke meseleyî ancax bi dîyalogan çareser benê. Şarê Filîstînî vera neheqîyan û qirkerdişanê Îsraîlî xo ver dano. Îsraîl bi bahaneya Hamasî hêrişê şarê Filîstînî keno. 

Kerdişê dewleta tirke kerdişanê Îsraîlî ra cîya nîyê. Îsraîl nika tunelanê Gazze bi awe keno de. Dewleta tirke zî vera tunelanê gerîlayan gazanê kîmyewîyan şuxilnena. Dewleta tirke Rojawan de waranê sivîlan, binawanî û dezgehanê xizmetî sey Îsraîlî hedef kena. 

Yanî a raşte şarê Filîstînî xemê dewleta tirke de nîyo. Dewleta tirke wazena mabênê Îsraîl û Hamasî de taqasê esîran de mabênçîtîye bikera. Destê ma de 2 selahîyetdarê MÎTî est ê. La dewleta tirke rojêke zî nînan nêpersena. Dewleta tirke teyna peyê menfaetanê xo de ya. Tek derdê ci zî qirkerdişê kurdan o.''