Endamê Konseya Rayberdişî ya PKKyî Mustafa Karasu bi meymanê Medya Haber TVyî û rojdem ercna.

Qiseykerdişê Karasuyî ra tay noqtayê girîngî wina yê:

''Vera Rayber Apoyî tecrîdo mutleq dewam keno. Şarê ma û têgêrayîşê ma 26 serrî yo vera nê tecrîdî xo ver dano û wayîrê Rayberîye vejîyeno. Dinya de zî wayîrvejîyayîşo winayên est o. 69 wayîranê Xelata Nobelî seba azadîya Rayber Apoyî mektube nuştbî. Dewleta tirke seba ke Rayber Apo mesaj nêşawo şarê ma pêvînayîşan asteng kena. Hinî tecrîd û îşkenceyê dewleta tirke teşhîr bîyê. Dewleta tirke dewleta şerê taybetî ya. Tecrîdî ra eşkera bena ke na dewlete senî faşîst a. Fikrê Rayber Apoyî teyna seba kurdan ney seba pêro dinya girîng ê. Paradîgmaya Rayber Apoyî reçeteya felate ya. 

Wexto ke Hemleya 15ê Tebaxe amebî îlankerdene ma zîndan de bîyî. La verê cû menga çeleyê 1983yî de keyeyêko botanij ame pêvînayîşê ma û vat ke têkoşînê gerîlayan do dest pêbikero. Ma rê amebi vatene ke embazî hê amadekarîye kenê. Xora tesîrê Hemleya 15ê Tebaxe zîndanan de muazam bi. Ma fam kerd ke xoverdayîşê ma yê vera îşkenceyanê zîndanan bîlasbeb nêşîyê. Hemleya 15ê Tebaxe moralêko pîl dabi ma. Hemleya 15ê Tebaxe xoverdayîşê zîndanan kerd zixmêr. 

Hemleya 15ê Tebaxe mîyanê şarê ma de hêvîyî gandar kerdî. Şarê kurdî newe ra fam kerd ke ê neteweyêk a. Kurdî ancî wayîrê erjanê xo, ziwan, edebîyat û kulturê xo vejîyayî. Hemleya 15ê Tebaxe warê kultur, huner û edebîyatî de tesîrê bomba kerd. Hemle ra pey MKM ronîya, muzîkê kurdan aver şi, edebîyatê kurdan aver şi. Hemleya 15ê Tebaxe seke ronesansê kurdan bîye.

Nika Herêmanê Pawitişî yê Medya de gerîlayî bi ruhê Hemleya 15ê Tebaxe xo ver danê. Yewinanê Hewayî yê Şehîd Dogan Zinarî çalakîyê girîngî kerdî. Heyf ke dişmen rîyê destekê PDKyî ra rayîran ra bi rehetî yeno û hêrişê şarê ma û gerîlayan keno. Dewleta tirke seke Başûr erdê ci yo bi rehetî tede têgêreno. Dewleta tirke dewanê Başûrî vêşnena, xalî kena la PDK teyna seyr kena.  Aseno ke no şer do wina dewam bikero. Xoverdayîşê kurdan zî do wina dewam bikero. Dewleta tirke dişmena pêro kurdan û Kurdîstanî ya. A raşte dewleta tirke estbîyayîşê PDKyî zî nêşinasnena.  Wa çew nêvajo ke dewleta tirke teyna vera PKKyî şer kena. 

Dewleta tirke û Iraqî peymanêke viraşta. Bi na peymane hetê PDKyî ra Iraq zî ame antene mîyanê şerî. Wina aseno ke dewleta Iraqî zî nêeşkena tarîxî biwana. Iraq do poşman bibo. Na peymane do seba Iraqî bi xeyr nêba. Seba tayê rehetîya ekonomîke û seba tayênê îmkanan dewleta tirke de pêkerdiş yeno manaya rotişê Iraqî. Iraqî wextê hêrişanê DAÎŞî de PKKyî rê sipas kerdbi. Nika PKK qedexe kerdo. PKKyî rûmet û ganê Iraqî pawit. La Iraqî verê şantajanê PDKyî de sereyê xo ard war. Ganî hêzê Iraqî vera na peymane vejîyê. Dewleta tirke armanc kena ke biresa sînoranê Mîsak-i Mîllî û a do wina rehet Iraqî ra nêvejîya.

Îqtîdarê AKP-MHPyî îqtîdarêko hende faşîst o ke seba ke kurdî tira fayde nêvînê qanûnanê holan zî asteng keno. Muxalefetê Tirkîya zî verê îqtîdarê AKP-MHPyî de qels o. Ganî meseleya kurdan biba rojdemê muxalefetî yo tewr verên.''