Endamê Komîteya Rayberdişî ya PKKyî Murat Karayilanî derheqê weçînayîşanê 14ê gulane de cewab da persanê ANFyî û venga pêro kesan da ke dormeyê Partîya Çep a Keske de bêrê têhet. 

Karayilanî destpêkê qiseykerdişê xo de bi wesîleya Menga Şehîdan şexsê Gulçîya Gabar û Dilxwaz Gabarî û hunermendê kurdî Cîhan Aymazî de pêro şehîdê têkoşînê azadîye û şorişî bi rêzî yad kerdî û soz da ke ê do tim perwerê vîrameyîşê şehîdan bibê. Karayilanî vat: ''Şehîdî hêzê ma yê esasî yê. Coka Rayber Apoyî tim vatêne 'PKK partîya şehîdan a.' Şehîdan têkoşînê azadîya Kurdîstanî pê gonîya xo nuşt. Ma do tim wayîrê vîrameyîşê şehîdanê xo vejîyê. Ma do her ca de wayîrê mîrasê şehîdanê xo vejîyê û qesasê înan bigêrê. Bi nê hawayî ma eşkenê ruhê înan zî bidê ciwîyayene. Şehîdê ma çimeyê ma yê hêzî yê û bêmerg ê.'' 

Karayilanî bale ante nîqaşanê serê Rayberê Şarê Kurdî Abdullah Ocalanî ser û vat: ''26 mengî yo Rayber Apoyî ra xeberêke zî nêna girewtene, o binê tecrîdêkê giranî de yo. Rixmê ney zî ey ser on nîqaşî yenê kerdene. Yew vano 'Şima şîyê ey hetî, destekê ci girewto.' Oyo bîn vano 'Ney şima hemrayanê ci de îtîfaq kerdo.' Xora nê nîqaşî mojnenê ke Rayber Apo sîyasetê Tirkîya de kesayetêko  xurt o. La îqtîdar zî muxalefet zî tecrîdî meşrû vîneno. Wa Rayberîye ser o nîqaşê winayênî nêrê kerdene. Nê nêzdîbîyayîşê ke Rayberîya ma kenê hacetî bêexlaqî yê. Meseleya Rayberîya ma hacetêkê weçînayîşî nîya. Reyna nê nîqaşî ma qerqilnenê. Beno ke asayîşê Rayber Apoyî binê tehlukeyî de yo. Wa hêzê mîyanneteweyî û hêzê neteweyî erkê xo bikerê û asayîşê Rayber Apoyî bîyarê ca. Bi taybetî wa dostê ma û şarê ma na babete ser o hayîdar bibê û meverdê ke Rayber Apo bibo hacetê weçînayîşî.''

Murat Karayilanî pare kerd ke weçînayîşê 14ê gulane zaf krîtîk ê û vat: ''Îqtîdarê AKP-MHPyî 8 serrî yo pê hêriş û şerî keno ke kurdan teslîm bigêro. La sere de Îmrali de, zîndanan de, koyan de, kuçeyan de û her ca de veera nê faşîzm xoverdayîş ame kerdene. Şarê ma bi xoverdayîşî mojna ke çew nêeşkeno îradeyê ci teslîm bigêro. Nika verê ma de weçînayîşî est ê. Şarê ma ganî nê îradeyê xo nika warê sîyasetî de bimojno. Ganî her keso ke îqtîdarê AKP-MHPyî ra zerar dîyo bi xurtî tewrê Îtîfaqê Partîya Çep a Keske bibo. Wa şarê kurdî hêzê xo weçînayîşan de zêde bikero, îradeyê xo bimojno her kesî. Beno ke tay nakokîyî est ê, beno ke tay namzedî goreyê zerrîya şarê ma nîyê. Şarê ma wa nînan bido kişte û giranîye bido meseleyanê esasan. Kurdî wa giranîye bidê meseleyanê xo yê neteweyîyan, yew bibê û yewîya xo bimojnê.

Hêzanê Kurdîstanîyan Îtîfaqê Demokrasî û Azadîye awan kerd. Tay dormeyî teberê ney de mendî. Ez venga nînan danê ke wa binê sîwana Partyîya Çep a Keske de destek bidê îtîfaqî. Eke nê hêzî wina bikerê do bingeyê yewîya kurdan awan bikerê. Xûlasa wa her kes dormeyê Partîya Çep a Keske de yew bibo û îradeyê xo bimojno. Bêguman eşkera yo ke nê weçînayîşî seba şarê ma zaf girîng ê û vurîyayîşêk zî hînî zaf lazim o.''