Fermandarê Qerargehê Merkezê Pawitişê Şarî Murat Karayilanî persê ajansê ma cewab kerdî. Qiseykerdişê Karayilanî ra qismêk wina yo:

''Şer û çalakîyê ke ewro yenê kerdene netîceya hêrişanê rejîmê AKP-MHPyî yê 9 serran ê vera Rayberîya ma, şarê ma û têgêrayîşê ma yê. Înan bi nê hedef kerd ke şarê ma rê çok bidê dayene û têgêrayîşê ma  bi temamî çîn bikerê. Bi paştdayîşê hêzanê teberî û hemkaran ê kurdan, bi îstîxbarat û teknîkî vat qey eşkenê ma tesfîye bikerê. Coka her çîyê Tirkîya semedê nê şerî xerc kerd. La rixmê heme cehdkerdişanê xo ê ser nêkewtî. Xora nê çalakîyê îspat kenê.

  Na hemleya gerîlayan a vera tecrîd û sîyasetê qirkerdişî ya

Nê prosesê ke eslê xo de bi çalakîya fedayîye ya 1ê teşrîna verêne ya Aqanra dest pêkerd, bi çalakîyanê 20 û 27ê teşrîna peyêne, 22-23ê kanûne û tewr peynî de zî 10-12ê çeleyî astêka serpilikî fînaye dest. Nê tarîxan de çalkîyê tarîxî ameyî kerdene la nê demî de xeylêk çalakîyê wirdî zî ameyî kerdene.  Na hemleya gerîlayan a vera tecrîd û sîyasetê qirkerdişî ya, cewabêk o.  Tewr peynî de Girê Amediyê de Operasyono Şorişgêr ê Şehîd Helmet Dêrelûkî ame kerdene. Na çalakîyêka serkewtî ya. Ma eşkenê vajê ke Operasyono Şorişgêr ê Şehîde Çîçeke Kiçî yo ke 2011 de Çelê de ame kerdene, o wextî ra nata na çalakîya tewr serkewtî ya.

Hemleya Şorişgêre zûrî fînayî çiman ver

Payîzê 2016 de gama ke dewleta tirke bi paştdayîşê gladioyê NATOyî droneyê çekdarî fînayî dest wezîrê karanê zereyî yê o wextî vatbi badê nîsana 2017î do qet çew nameyê PKKyî megêro fekê xo. Ê bi paştdayîşê teberî û tekînîkî pê xo bawer bê. Înan vat qey meseleya kurdan ke meseleya komelkî ya, bi teknîk û îstîxbaratî qedînenê. Dima ra 2021 de Iraq û PDKyî reyde pêvînayîşî kerdî û bi paştdayîşê înan zî 10ê sibata 2021î de vera Garê hêriş kerd. Planê înan o bi ke yew di aşman de Herêmanê Pawitişî yê Medya bi temamî çîn bikerê. La hesabê înan hêna nêtepiş. Vatêne qey hîrê aşman de qedînê la hîrê serrî yo Zap, Avaşîn û Metîna de ginayî piro tede mendî. Raştîya şerî şaranê Tirkîya ra yena nimitene.

2022 de Hulusî Akarî qala serkewtiş kerdene ke raştîye de binate de qet serkewtişê înan çînebi. Nika nê çalakîyanê serkewteyan heme zûrê înan fînayî çiman ver. Hemleya şorişgêre ya ke bi çalakîya Anqara dest pê kerde û bi çalakîya Girê Amediyê resaye serpilikî, çokdayîşê Planê Çokdayîşî yê îdareyê faşîstî yê AKP-MHPyî mojna ra.

Gerîlayan mesajê xo da

Nê çalakîyan hetê leşkerî ra serewtişê gerîlayan mojna ra. Heto tewr muhîm ê stratejîya şerêkî bi tay vînîbîyayeyan destfînayîşê netîceyanê pîlan o. Bitaybetî 3 serranê peyênan de Gerîlayê Azadîye yê Kurdîstanî bi rûhê fedayîtî, bi taktîkanê xurtan şinê dişmenî ser.  Yanî bi tay vînîbîyayeyan netîceyanê pîlan fînenê dest. No eşkera yo. Nê hetî ra eşkerayîyê dezgehanê dewleta tirke yê derheqê vînîbayayeyanê ma heme faso fîso yê;  bi zûran kenê ke şarî bixapînê. Bi qala kilme hetê leşkerî ra performanso muhîm ameyo destfînayene. Xora no têkoşîn xo hetê sîyasî ra zî mojneno ra. No hêzo hêzdar, qerardar bi tewirê xo yê îdeolojîk û leşkerî zî mojnena ra ke bin nêkewno.

Şima nêeşkenê şarê tewr qadîmî yê na herre nêvînayîşî ra bêrê û bi şîdetî çîn bikerê. Têkoşînê ke yenê kerdene û çalakîyê peyênî no hêna vet meydan. Eke no zîhnîyeto faşîst hêrişê xo de israr bikero, Herêmê Pawitişî yê Medya do bibê mezelê ci.

Rayber Apoyî sîyaseto qirker betal kerd

Hedefê hêrişanê şerê qirkerdişî yo Îmrali yo. Îmrali de eşkera hem qanûnanê xo hem zî qanûnanê mîyanneteweyî binpay kenê. Sîtemê tecrîd û îşkenceyê polîtîkî nayo ro.  Kenê ke bi nê caardişî hêvîya şarê kurdî bişikinê, Rayber Apoyî bidê vîrakerdene. Bi tecrîdê giranî, hêrişê giranî yê vera şarî û şerê giranî yê vera gerîlayan wazenê Rayber Apoyî rê peyser game bidê eştene. La Rayber Apoyî pîya bi hemrayanê xo yê ke cayê ey de yê, rixmê heme hêrişan  sîyaseto qirkerd betal kerd. Kampanyaya ke semedê azadîya Rayber Appyî çareserîya meseleya kurdan dîyaye destpêkerdene çend şina vila bena. Raberîya ma sînoranê Kurdîstanî ra vejîyayo hinî bîyo global. Rayber Apo her hetê dinya de rayberêk û fîlozofêkê demî yo. Na çarçewe de tewr peynî de 564 roşnvîr û hunermendan vilawekêke vila kerd. Bi na wesîle ez nê kesan selam kena ke morê xo dayo binê na vilaveke ro.

Artêşa tirke bi hetkarîya PDKyî cenazayê xo girewtî

Artêşa tirke tim merdeyanê xo nimnena.  Nê çalakîyanê peyênan de qismêkê merdayanê xo eşkera kerdî. Bêşik xeylêk sebebê nê est ê. Sebebo verên nê çalkaîyanê peyênan de hûmara merdeyanê înan zaf bî. Seba ke merdeyê înan zaf bî mecbûr mendê ke taynan eşkera bikerê.  Çunke nê cenazayî yenê berdene nêweşxaneyan, morgan û yenê vînayene eşnawitene. Hetê bînî ra nê cenazayî dewleta tirke bi îmkananê xo nêgirewtî. Bi hetkarîya PDKyî merde û birîndarê xo Amediyê ra berdî Tirkîya. Heta dewijî vistê dewre, dewijî erazî de gerayî cenazayanê leşkeran ke vînî bîyî û ê teslîmê PDKyî kerdî, înan zî teslîmê Tirkîya kerdî.  Yanî yew tablo est o ke nêeşekno bêro nimitene. Coka mecbûr mendî tay îtîraf kerdî. 

Xakurkê de zî leşkerêkî telefon de fermandarê xo rê vat 6 merdeyê înan est ê û beno ke zafêr bê. No înternet de vila bi. Xora hûmara merdeyan zî 6 nê 27 bî û cenazayê înan hîrê rojî ûca mendî. Coka tay çîyan hinî nêeşkenê binimnê. Hetêkî ra merdeyanê xo nimnenê hetê bînî ra bi xebaranê zûran MÎTî wasifnenê û şarî xapînenê. No zî zeîfîya înan mojneno ra. Ma nêwazenê leşkeran bimirnê. Waştişê ma oyo ke ma verê gonî bigêrê. Berpirsîyarê nê mergan ma nîyê. Sebenê nê êyê ke şer xorî kerdo, heta Amediyê semedê îşxalê mendeyî  ameyî. Senî embaz Abasî zî vat berpirsîyaro esasî Tayyîp Erdogan û Bahçelî yê.

Vera Rojawanî sûcê merdimîye yenê kerdene

Hêrişê dewleta tirke yê vera Rojawanî xora sûcê merdimîye yê. Rojawan de tim nameyê partîya ma PKKyî şuxilnenî. Vanê înan derba daye çimeyê fînansî yê PKKyî ro. Çi eleqeya ci est o? Na zûra gird a. Dewleta tirke wazena sûcanê xo meşrû bikero.  Eslê xo de wazena Îdareyê Xoserîya Demokratîke werta wedaro. Çew vano qey PKK ûca de yo. Eleqaya înan bi raştîye çîn a.  Eslê xo de wazena sîstemê ûcayî birijno.

PDK paştî dano hêrişê qirkerdişê vera kurdan

Hemkarîya PDKyî ya bi dewleta tirke meseleya giran a. Na têna meseleya binateyê  di rêxistinan nîya. Vakurê Kurdîstanî de şarê ma seba ke meseleya kurdan bêro çareserkerdene fedakarîya pîle keno. Zîndanan de nizdê des hezaran welatperwerê şorişgêrî est ê. Vera Rayber Apoyî sîstemê tecrîdî est o. Hekarîya PDKyî ya bi  îqtîdarê AKP-MHPyî paştî nêdano çareserîye paştî dano hetê bêçareserîye. Yanî tewirê PDKyî destê hêzanê faşîstan hêzdar keno ke wazenê kurdan qir bikerê.  

Vakurê Kurdîstanî nimeyê Kurdîstanî yo. Bêçareserîya nê hêtî tesîrê ameyoxê heme Kurdîstanî keno. Coka hemkarîya PDK û dewleta tirke meseleyêka neteweyî ya. Ganî her kes şiro PDKyî ser ke no tewirê xo caverdo. Wa no bêro zanayene ke dewleta tirke tarîxî ra cayo ke îşxal kerdo tira nêvejîyena. Qey PDK seba ke dewleta tirke herra Başûrê Kurdîstanî îşxal bikero kede dano? Seba ke dewleta tirke xo Girê Amediyê de ca bikero qey hend paştî dano ci? Seba ke têkoşînê gerîlayan bêro şiktene qey hend falîyetê ambargo, girewtişê rayîran û îxbarî rayra beno? Çew nêeşkeno nê fam bikero. Mabenê înan de pêkerdişo nimite est o, çew nêzano. Gano no bero eşkerakerdene.''